Zelenski Rustem Umerovu Yermakın yerinə təyin etdi

Ukrayna prezidenti Volodimir Zelenski “sülh planı” üzrə danışıqlar üçün nümayəndə heyətinin tərkibinə dair fərmanına dəyişiklik edib.

Hurriyyet.Az Ölkə.az-a istinadla xəbər verir ki, müvafiq fərman Ukrayna prezidentinin saytında dərc olunub.

Noyabrın 22-də Zelenski “ədalətli və davamlı sülhə nail olmaq üçün ABŞ və Ukraynanın digər beynəlxalq tərəfdaşları, habelə Rusiya Federasiyasının nümayəndələri ilə” danışıqlar prosesində iştirak etmək üçün Ukrayna nümayəndə heyətinin yaradılması haqqında fərman imzalayıb. Zelenski Ukrayna prezidentinin aparatının rəhbəri Andriy Yermakı nümayəndə heyətinin rəhbəri təyin edib.

Lakin Prezident Volodimir Zelenski cümə günü Andrey Yermakı prezident aparatının rəhbəri vəzifəsindən azad edib. Bu, Yermakın evində korrupsiyaya qarşı mübarizə orqanları tərəfindən aparılan axtarışlardan sonra baş verib.

Zelenski Ukrayna nümayəndə heyətinin tərkibinə dəyişiklik edərək  yeni rəhbər kimi ölkənin Milli Təhlükəsizlik və Müdafiə Şurasının katibi Rustem Umerovu təyin edib.

Ukrayna prezidentinin dəftərxanasından bildirilib ki, Umerov noyabrın 29-da artıq prezidentə Amerika tərəfi ilə görüşlərə hazırlıqla bağlı hesabat verib.

Ukrayna prezidentinin dəftərxanası əlavə edib ki, Ukrayna nümayəndə heyəti artıq ABŞ-a yollanır.

Bloomberg xəbər verir ki, Ukrayna nümayəndə heyəti Floridada olacaq və orada ABŞ prezidentinin nümayəndəsi Stiv Vitkoff və Donald Trampın kürəkəni Jared Kuşnerlə görüşəcək.

Mürtəza