Yeni icra başçısı müavinini işdən çıxardı
Nəsimi Rayon İcra Hakimiyyətində kadr dəyişikliyi olub.
Hurriyyet.az-ın əldə etdiyi xəbərə görə, bu barədə icra başçısı Elxan İbrahimov əmr imzalayıb.
Əmrə əsasən, Nəsimi Rayon İcra Hakimiyyəti başçısının müavini Ramiz Quliyev işdən çıxarılıb. O, 2021-ci il yanvar ayından bu vəzifəsdə çalışırdı.
Hələlik R.Quliyevin yerinə təyinat olmayıb.
Qeyd edək ki, Quliyev Ramiz Səmərxan oğlu 19.01.1966-cı ildə Bakı şəhərində anadan olub.
1974-1984-cü illərdə Bakı şəhəri, Nərimanov rayonu 82 nömrəli orta-ümumtəhsil məktəbində təhsil alıb. Həmin ildə Azərbaycan Dövlət Pedaqoji İnstitutuna daxil olub. 1984-1985-ci illərdə hərbi xidmət keçib.
1986-də Bakı Elektrik Hesablayıcı zavodunda fəhlə kimi əmək fəaliyyətinə başlayıb.
1986-1989-cu illərdə Bakı İnşaat Texnikumunda təhsil alıb.
1988-1991-ci illərdə Təmir Tikinti İdarəsində tikinti ustası vəzifəsində çalışıb.
1991-1993-cü illərdə Nizami rayon Tikinti-təmir idarəsində iş icraçısı, rəis, baş mühəndis vəzifələrini tutub.
1993-1995-ci illərdə “Xəzri” Tikinti Firmasında direktor müavini, 1995-ci illərdə Təsərrüfat Hesablı Bərpa Təmir-Tikinti idarəsində rəis vəzifəsində, 1995-1997-ci illərdə Əhaliyə xidmət fərdi və bağ evlərinin tikintisi üzrə Baş İstehsalat İdarəsi 2 nömrəli trestində müdir vəzifəsində, 1997-1999-cu illərdə “Teomontaj” Dövlət Kiçik Müəssisəsində direktor müavini vəzifəsində çalışıb.
1998-ci ildə Azərbaycan Memarlıq və İnşaat Universitetinə daxil olmuş, 2003-cü ildə həmin universitetin Mühəndis sistemlərinin və qurğularının tikintisi ixtisası üzrə bitirib.
1999-cu illərdə Abşeron Regional Səhmdar Su Cəmiyyətinin Nəsimi rayon filialında rəis vəzifəsində, 1999-2001-ci illərdə 3 nömrəli Təsərrüfatlararası istehsalat Təmir-Tikinti Trestində rəis vəzifəsində, 2001-2020-ci illərdə Bakı Şəhər İcra Hakimiyyətində Ərazi İdarəetmə orqanları ilə iş şöbəsində baş məsləhətçi vəzifəsində çalışıb.
2020-2021-ci illərdə Şəhərsalma və Arxitektura Komitəsində Regionlarla İş şöbəsində şöbə müdiri olub.
Prezident İlham Əliyevin 24 iyun 2024-cü il tarixli, 171 nömrəli Sərəncamı ilə “Dövlət qulluğunda fərqlənməyə görə” medalı ilə təltif olunub.
2001-ci ildən Yeni Azərbaycan Partiyasının üzvüdür.
Ailəlidir, 4 övladı var.
Xatırladaq ki, Prezident İlham Əliyevin 12 noyabr 2025-ci il tarixli Sərəncamı ilə Elxan İbrahimov Nəsimi Rayon İcra Hakimiyyətinin başçısı vəzifəsinə təyin olunub.
Yenisabah.az