Ucar sakini “Aztelekom” MMC-dən şikayət edir, qarşı tərəf isə...

Ucar rayon sakini Həsənov Daşqın Mahir oğlu tərəfindən Hurriyyet.az saytının redaksiyasına şikayət məktubu daxil olub. O, “Aztelekom” MMC-dən şikayət edir:

“Mən, Həsənov Daşqın Mahir oğlu, yazıb sizdən xahiş edirəm ki, problemimi işıqlandırasınız.

Məlumat üçün bildirim ki, evimdə bir ay yaşayış olmadı. Qayıdan zaman internet xəttini açdırmaq istədim. Mənə bildirdilər ki, 140 manat cərimə olunmusunuz. 1 ay internet istifadə etmədiyim üçün niyə cərimə olunmalıyam?”

Məsələ ilə bağlı “Aztelekom” MMC-yə sorğu ünvanladıq. Sorğumuza cavab olaraq bildirildi ki, “Aztelekom” Məhdud Məsuliyyətli Cəmiyyəti ilə abunəçilər arasında münasibətlər müvafiq qaydada, tərəflər arasında imzalanmış telekommunikasiya xidmətlərinin göstərilməsi barədə müqaviləyə və qüvvədə olan qanunvericiliyin tələblərinə əsasən tənzimlənir:

“Belə ki, müştərilər müqavilə ilə müəyyən edilmiş şərtlərə əsasən, 12 ay ardıcıl olaraq gecikməyə yol vermədən xidmətdən istifadə ilə bağlı ödənişləri həyata keçirdiyi halda qoşulma haqqı və ONT modemin ödənişi tələb olunmadan modem abunəçinin istifadəsinə verilir. Abunəçi tərəfindən müqavilə ilə müəyyən edilmiş ödənişin icrası gecikdirilərsə, o halda modemin dəyəri və qoşulma haqqı operatora tam şəkildə ödənilməlidir.

Sorğuda qeyd edilən halda da internet xidmətinin göstərilməsi ilə bağlı 28.11.2023-cü ildə yuxarıda qeyd edilmiş şərtlərlə müqavilə bağlanılıb. Abunəçiyə ödənilməsi bildirilmiş məbləğ heç bir halda hər hansı cərimə və ya əlavə ödəniş deyil. Sözügedən məbləğ internet xidməti qoşularkən abunəçiyə güzəşt edilmiş, müqavilə şərtlərinə əməl edilməməklə xidmətdən istifadə ilə bağlı ödəniş öhdəliyi vaxtında icra edilməməsi səbəbi ilə qoşulma haqqı və modemin dəyərinin ödənilməsi öhdəliyidir.

Abunəçilər ONT modemin qiyməti, qoşulma şərtləri və tariflərlə bağlı ətraflı məlumatla aztelekom.az saytında tanış ola bilərlər”.

Aynurə İSMAYIL

Hurriyyet.az