TANINMIŞ YAZAR BƏZİ JURNALİSTLƏRİ TƏNQİD ETDİ - “Normal redaktə etsən, yazıları qıpqırmızı olacaq”

Dünən Milli Məclisdə “Azərbaycan dilinin dövlət dili kimi inkişaf strategiyası: Mövcud vəziyyət və perspektivlər” mövzusuna həsr edilən konfransda AMEA Nəsimi adına Dilçilik İnstitutunun direktoru, filologiya elmləri doktoru, professor Nadir Məmmədli bildirib ki, Azərbaycan dilinin tərcümə alqoritmləri yaradılmalıdır:

“Əcnəbi dillərdən sözlər mənimsəmək əvəzinə, türkdilli xalqlardan lazımlı kəlmələri götürək. Bundan əlavə, rəsmi üslubumuzun vəziyyəti yaxşılaşdırılmalıdır. Həmçinin Azərbaycan dilinin tarixi yeni əsaslarla hazırlanmalıdır”.

Dilimizlə bağlı Milli Məclisdə belə bir konfransın keçirilməsi təqdirəlayiq olsa da, elə konfransda çıxış edən Audiovizual Şuranın sədri İsmət Səttarovun “Azərbaycan televiziyalarında verilişlərdə monitorinq etdik və aparıcılar tərəfindən iki həftə ərzində 3 minə yaxın əcnəbi sözün işləndiyinin şahidi olduq, yanvar ayından xəbərdarlıq göndərəcəyik” deməsi dilimizin durumunun acınacaqlı şəkildə olduğunu göstərir. Təəssüf ki, dilimizi istənilən səviyyədə qoruya bilmirik. Dilimizin rəsmi üslubunu televiziya kanalları, qəzet və saytlar yaxşılaşdırmalı olduğu halda, elə bu media mənsubları pozurlar.

Son zamanlarda saytlarda yazan jurnalistlərin dilimizin rəsmi üslubunu pozması ilə bağlı yazıçı, kinodramaturq Eldəniz Quliyev Hurriyyet.az-a mövqeyini belə ifadə edib: “Bərk gedən bir jurnalistin yazısını qoy qabağına, qırımızı qələm götür, onu normal redaktə etsən, həmin o yazı qıpqırmızı olacaq. Kim nə gəlir başlığa çıxarır, nə gəlir danışırlar. Yəni bunlar Azərbaycan mədəniyyətinə, mənəviyyatına zərbədir. İlk növbədə, anamızın dilinə olan zərbədir. Bu, təəssüf hissi doğurur”.

CAVİD