.jpg)
Tanınmış jurnalist Gündüz Tahirli ABŞ-da yaratdığı Fond haqqında Diasporla İş üzrə Dövlət Komitəsinin Mətbuat Xidmətinə müsahibə verib.
Müsahibəni təqdim edirik.
Gündüz Tahirli çoxdandır ABŞ-a köçsə də, nə jurnalistlərin, düşünürəm ki, nə də digər insanların yaddaşından silinməyib. O, Azərbaycanın tanınmış jurnalisti, dahi şairimiz Mirzə Ələkbər Sabirin nəvəsidir. G.Tahirli Amerika Birləşmiş Ştatlarında biznes fəaliyyətilə məşğuldur və onun mütləq Azərbaycan üçün faydalı işlər görəcəyinə hər zaman ümid edirdim.
Onunla vaxtaşırı əlaqə saxlayıram və gördüyü işlərlə bağlı ətraflı məlumat verməsini rica edirəm. 5 iyul Diasporla İş üzrə Dövlət Komitəsinin yaradıldığı gündür. Belə bir gündə imkan daxlində diasporumuzun fəaliyyətinin daha geniş işıqlandırılmasına çalışırıq. Tələbə yoldaşım və bu gün işimlə bağlı ifadə etsəm, diasporumuzun bir üzvü, Vaşinqtonda yaşayan Gündüz Tahirli yeni yaratdığı xeyriyyə Fondu barədə suallarıma cavab verdi.
– United Charities for Azerbaijan hansı məqsədlə yaradılıb və belə bir Fondun yaradılmasına nə zaman qərar vermisiz?
– Bu haqda düşünürdüm və burada yaşayan azərbaycanlılarla ünsiyyəti dərinləşdirməyə, daha çox insanla münasibət qurmağa çalışırdım. Sayca ilk böyük görüşümüz Şuşa alınan gün oldu. Çoxdandır üzərində işlədiyimiz ideyanın reallaşma zamanı idi. Fond Qarabağ müharibəsi şəhidlərinin övladlarına, qaziərimizə və onların övladlarına maddi və mənəvi dəstək olmağı hədəfləyir. Əsas məqsədimiz həmin ailələrdən olan uşaqların təhsil imkanlarını yaxşılaşdırmaqdır.
– Fond rəsmi qeydiyyata alınıb?
-Bəli, təsis toplantımızı keçirdikdən sonra Fondun rəsmi qeydiyyata alınması da reallaşdı.
– Soyadaşlarımızla əlaqələri necə qurusunuz?
– Pandemiya dövründə təbii ki, əlaqələrimiz və bütün görüşlərimiz yalnız internet üzərindən olur. Təbii ki, Fonda vəsaitin daxil olması da məhz bu yolla həyata keçirilir. Yəni hazırda bütün fəaliyyətimiz internet üzərindən tənzimlənir.
– Konkret nəticədən danışaq.
– Soydaşlarımız bu işə həssaslıqla yanaşırlar və biz hədəfimizə doğru addım-addım gedirik. Artıq müəyyən məbləğlər toplanıb və nümunə üçün deyə bilərəm ki, biz təhsil imkanlarını yaxşılaşdırmaq üçün nəzərdə tutduğumuz kateqoriyadan olan bir neçə soydaşımıza kompüterlər alıb göndərmişik. UCA-in layihələri çox konkret layihələrdir. İcma nümayəndələrimiz verdiyi ianənin konkret olaraq kimlərə və nə üçün xərcləndiyini çox gözəl bilir. Biz çox konkret talelərə həmdərd olmağa çalışırıq və çağırışlarımız da bu xarakteri daşıyır. Fondun Facebook və Web-səhifələrində layihələrimiz açıq görünür. Bundan sonra da toplanan bütün məbləğ qazilərimizə, qazi və şəhidlərimizin ailələrinə xərclənəcək.
– Fondun gələcək fəaliyyətində yeni istiqamətlər üzərində düşünürsüzmü?
– Bütün gücümüzü bir istiqamətə yönəldirik. Bizim əsas işimiz ölkəmizdə təhsil problemlərinə kömək etmək, qeyd etdiyim soydaşlarımızın təhsil imkanlarının genişlənməsi üçün faydalı addımlar atmaq, maraqlı layihələr həyata keçirməkdir. Heç bir siyasi fəaliyyətlə məşğul olmuruq və qazi və şəhid ailələrinə yardım etmək əsas məqsədimizdir.
– Fondun işinin yaxşı nəticələrə gətirib çıxarması daha çox nəyə bağlı ola bilər?
-Məncə ən vacibi davamlılıq və kütləvilikdir.İşimizin uğuru buna bağlıdır.
– Diasporla İş üzrə Dövlət Komitəsi ilə əməkdaşlıq etmək barədə nə düşünürsüz?
-Düşünürəm ki, bu əməkdaşlıq ancaq işin xeyrinə olar, niyə də olmasın ki…Təbii ki, əməkdaşlığı düşünürəm. \\Musavat.com
