Samirə Bağırova: “Evlənməklə kişilik olmur”

“Subay bəylərin və xanımların günümüzün aktual mövzularından olan sualları: niyə evlənməyə yaxşı qız tapa bilmirik, yaxud evlənmək üçün normal kişi yoxdur... Əsrlərlə hər kəsi maraqlandıran bir sual var idi: axı qadınlar nə istəyirlər? Bu gün bu sual bəylərə də aiddir. Xanımlar və bəylər, siz nə istəyirsiniz? Əslində, bunun qısa cavabı var: siz hər şeyi birdən-birə bir arada görmək istəyirsiniz. Yəni eqonuzu o qədər mərkəzə gətirmisiniz və unutmusunuz ki, övladlar əslində şüuraltı olaraq öz valideynlərinə bənzər obraz seçirlər - ya yaxşı mənada, ya da pis mənada...”

Hurriyyet.Az xəbər verir ki, bu sözləri tanınmış psixoloq Samirə Bağırova deyib.
Psixoloq bildirib ki, üç yaşdan beş yaşadək qız uşaqları ilk dəfə atalarına aşiq olurlar: “Eləcə də oğlan uşaqları. Yaxud uşaqlar valideynləri haqqında danışılanlara aşiq olurlar - natamam ailədə böyüyüblərsə, ata-ana yoxdursa... Belə deyim var ki, hər bir qız uşağının həyat hekayəsini atası yazır. Başqa bir deyim də var: hər bir qadın Allahın kişiyə verdiyi ya payıdır, ya da imtahanı. Əks tərəfi gördükdə, pis mənada da olsa, şüuraltındakı ya ana, ya ata tərəfdən travmamız gözümüzün qarşısında canlanır və bizi maqnit kimi özünə çəkir. Nə vaxt ki xanımlar həqiqətən ailə qurmaq, ana olmaq, bişirib-düşürmək, bir ocaq, ailə yaratmaq, həyat yoldaşına qadın olmaq istəyəcəklər, özlərini kimləsə müqayisə etməkdən, qlamur görünməkdən, poz verməkdən, göstəriş etməkdən çəkinəcəklər, əsl kişilər o vaxt peyda olacaqlar. Evlənməklə kişilik olmur. Bir kişi həyat yoldaşına ev işlərində kömək edirsə, uşaq xəstələnəndə qadına yardım edirsə, onun tərbiyəsində iştirak edirsə, bezini dəyişirsə, kişilik o vaxt olur. Hər şeydə qadının yanındadırsa, deməli, bu kişi həm ərlik, həm də atalıq vəzifəsini yerinə yetirmiş olur. “Ailə” dediyin bax, budur. Bu səbədən nə istədiyini dəqiq bilməlisən”. \\Pravda.az