Rusiyanın NATO-dakı daimi nümayəndəliyi ləğv olunur
Hurriyyet.az “İnterfaks” agentliyinə istinadən xəbər verir ki, Rusiyanın Xarici İşlər naziri Sergey Lavrov ölkəsinin NATO yanındakı daimi nümayəndəliyinin işini dayandırdığını bildirib.
Lavrov deyib: “NATO-nun addımlarına cavab olaraq, biz NATO-nun yanındakı daimi nümayəndəliyimizin, o cümlədən baş hərbi təmsilçimizin işini dayandırırıq”.
“İkincisi, biz NATO-nun Moskvadakı hərbi missiyasının fəaliyyətini dayandırırıq. Onun əməkdaşlarının akkreditasiyası cari ilin 1 noyabr tarixindən ləğv olunur. Üçüncüsü, NATO-nun Moskvadakı informasiya bürosununun da fəaliyyəti dayandırılır”.
“NATO-nun hansısa təcili işi olarsa, bu məsələlərlə bağlı Belçikadakı səfirimiz ilə əlaqə saxlaya bilərlər. Həmin səfir ikitərəfli əlaqələri təmin edəcək”.
Lavrovun sözlərinə görə, oktyabrın 6-da NATO katibliyi rəsmən bildirib ki, Şimali Atlantika alyansının Baş katibi Yens Stoltenberq noyabrın 1-dən etibarən Rusiyanın NATO yanındakı daimi nümayəndəliyinin səkkiz əməkdaşının akkreditasiyasını ləğv eləmək, həmçinin, inzibati-texniki personal da daxil olmaqla, bu nümayəndəliyin əməkdaşlarının sayını 10-a qədər azaltmaq qərarını verib.
Lavrov NATO tərəfinin bu addımın səbəbləri barəsində heç bir izahat vermədiyini də söyləyib.
Hürr Tərcüman