"Rusiyanın Gürcüstanla bağlı yeni layihəsinin olması ehtimalı böyükdür" - KƏNAN NOVRUZOV

""Xarici agentlər haqqında" qanun layihəsi qəbul olunmasa və yaxın zamanda sabitlik təmin olunarsa, bu, Gürcüstanın Avropa İttifaqına üzvlük istiqamətində növbəti addımı, daha bir maneəni dəf etməsi olacaq"

""Xarici agentlər haqqında" qanun layihəsi Gürcüstan parlamentindən geri götürülüb. Bu barədə qanun layihəsinin təşəbbüskarı olan hakim "Gürcü arzusu"nun, "Xalqın Gücü" ictimai hərəkatının və parlament çoxluğunun birgə bəyanatında qeyd olunub. Bildirilib ki, bu, ölkədə sülh və əmin-amanlığı qorumaq üçündür: "Vətəndaşlarımızın enerjisini qarşıdurmaya deyil, sülhə, ölkəni düzgün istiqamətdə inkişaf etdirməyə sərf etməliyik". Məlum olduğu kimi, martın 7-də Gürcüstan parlamenti birinci oxunuşda Rusiya qanunvericiliyinin analoqu olan "Xarici agentlər haqqında" qanun layihəsini dəstəkləyib. Sənəddə KİV-ə və xaricdən maliyyə alan ictimai təşkilatlara "xarici təsir agenti" statusunun verilməsi təklif edilir". Hurriyyet.az xəbər verir ki, bunu Beynəlxalq Münasibətlər və Diplomatiya Araşdırmaları Mərkəzinin eksperti Kənan Novruzov qeyd edib.

Bundan sonra Tiflisdə qanun layihəsinə qarşı genişmiqyaslı etiraz aksiyalarının başladığını vurğulayan ekspert bildirib ki, Gürcüstan prezidenti Salome Zurabişvili nümayişçiləri dəstəklədiyini bəyan edib və qanuna veto qoyacağını vəd edib: "Əslində bu, gözlənilən idi. Qanun layihəsi geri götürülməsəydi, etirazlar daha da güclənə bilərdi. Bu isə ölkə daxilindəki sabitliyə zərbə vuracaqdı. Parlamentarilərinin qanun layihəsini geri götürməsi, yəqin ki, daha çox bu reallıqla bağlı oldu. Amma bundan sonra Moskva ilə Tiflis arasında münasibətlərin gərginləşməsi, Rusiyanın Gürcüstana təzyiq göstərməsi mümkündür".

Kənan Novruzovun sözlərinə görə, Gürcüstan müxalifətindən bildirilib ki, qanun layihəsinin geri götürülməyinə baxmayaraq, aksiyalar davam edəcək: "Əlbəttə, belə də olmalıdır. Əks halda qanun layihəsinin yenidən gündəmə gəlməsi üçün şərait yarana bilər. Hökumət xalqın müqavimətini və əzmkarlığını görməlidir. Ümumiyyətlə, Gürcüstandakı son hadisələr göstərir ki, Rusiyanın bu ölkə ilə bağlı yeni layihəsinin olması ehtimalı böyükdür. Sözügedən qanun layihəsi Gürcüstanda Avropa İttifaqı ilə Rusiyanın rəqabətini artıracaq. Gürcüstanda sözügedən qanun layihəsi qəbul olmaz və yaxın zamanda sabitlik təmin olunarsa, bu, ölkənin Avropa İttifaqına üzvlük istiqamətində növbəti addımı, daha bir maneəni dəf etməsi olacaq".

Vazeh BƏHRAMOĞLU,

Hurriyyet.az