“Qarabağ problemi həll edilmədən sülh müqaviləsi bağlana bilməz” - Armen Qriqoryan

2022-11-15 09:07:00

“Qarabağ problemi həll edilmədən sülh müqaviləsi bağlana bilməz” - Armen Qriqoryan

Ermənistan Təhlükəsizlik Şurasının katibi Armen Qriqoryan əsassız yerə Azərbaycanı vəziyyəti gərginləşdirməkdə suçlayıb.

Hurriyet.az musavat.com-a istinadən xəbər verir ki, bu barədə o, yerli "civilnet" saytına müsahibəsində bildirib. Ermənistan rəsmisinin iddiasına görə, Azərbaycan Müdafiə Nazirliyinin "atəşkəs rejiminin pozulması" ilə bağlı yaydığı xəbərlər vəziyyəti gərginləşdirməyə, daha sonra isə hərbi əməliyyatların həyata keçirilməsinə yönəlib.

Armen Qriqoryanın bir sonrakı fikirlərində Ermənistanın "sülh prosesi" adı altında nəyi nəzərdə tutduğu ortaya çıxır: "Azərbaycan vəziyyəti nə qədər gərginləşdirərsə, Qarabağ ermənilərinin hüquq və təhlükəsizliyinin müzakirəsi və bunun beynəlxalq mexanizmin yaradılması bir o qədər aktuallaşır".

A.Qriqoryan, Azərbaycanın sülh müqaviləsinin 5 bəndini, sonra daha ətraflı mətni təqdim etdiyini xatırladıb.

"Biz bu mətn üzərində işlədik, ona çərçivə sazişi formasını verdik və onun əsasında noyabrın 7-də Vaşinqtonda xarici işlər nazirlərinin görüşü keçirildi. Bu mətn məncə, əhatəlidir və Ermənistanla Azərbaycan arasında mövcud olan problemləri həll edə bilər. Sülh prosesinin çərçivəsi, bununla əlaqədar məsələlər, çalışacağımız istiqamətlər getdikcə daha dəqiqləşir",-deyə o, bildirib.

Rusiyanın təkliflərinin etibarlı olub-olmaması ilə bağlı suala Armen Qriqoryan belə cavab verib: "Ermənistan bu təkliflərin Soçi bəyanatında göstərilməli olmasında israr etdi, lakin onlar yekun mətndə qeyd olunmadı. Gəlin işləməyə davam edək. Ümumiyyətlə, bu təkliflər hazırkı dövrdəki proseslərlə uzlaşır. Qlobal miqyasda bu mətnlər bir-birinə bağlıdır" .

Qriqoryanın sözlərinə görə, Ermənistanla Azərbaycan arasında 4 böyük mövzu var ki, onlar da öz növbəsində alt mövzulara bölünür: "Birincisi, humanitar məsələlər, bütün əsirlərin tezliklə azad edilməsi, ikincisi, nəqliyyat yollarının açılması, daha sonra delimitasiya, sərhədlərin təhlükəsizliyi və Dağlıq Qarabağ probleminin həlli üzrə komissiyaların işidir. Təbii ki, danışıqlarda Qarabağ məsələsi müzakirə olunur, biz irəliləyişlə bağlı mümkün həll yollarını axtarırıq. Məsələni gələcəyə buraxmaq, ya da Dağlıq Qarabağla Azərbaycan arasında hüquq və təhlükəsizliyin müzakirəsi üçün beynəlxalq mexanizm yaratmaq variantı var. Dağlıq Qarabağ problemini həll etmədən, heç olmasa Qarabağ probleminin necə həll olunacağına aydınlıq gətirmədən sülh müqaviləsi bağlamaq mümkün deyil. Qarabağ problemindən yan keçmək mümkün deyil, bu, bütün iclaslarda müzakirə olunur, gündəmdədir".

ErmənistanTəhlükəsizlik Şurasının katibinin sözlərinə görə, hazırda Qarabağ məsələsini sülh müqaviləsi prosesindən necə ayırmaq barədə müzakirələr gedir.

"Çünki uzun müddətdir ki, Qarabağ probleminin sülh sazişinin tərkib hissəsi kimi, prosesin bir hissəsi kimi həlli yolu tapılmayıb. İndi biz mövzuları hüdudlandırmağa çalışırıq, lakin bunun üçün zəmanətlər lazımdır. Zəmanət olmadan bunu sülh müqaviləsində əks etdirməmək mümkün deyil", - deyə Qriqoryan bildirib.


Ada Studiya

Ailə, uşaq, fərdi, hamilə, cütlük və ad günü çəkilişləri.
Əlaqə: 0557949055
İnstagram: _ada_studio
Tiktok: adastudiya


Load Time (S) : 0.191419