"Putin elə bir varis seçmək istəyəcək ki, Ukrayna ilə müharibəni davam etdirsin" - ELXAN ŞAHİNOĞLU

2023-01-05 14:02:00

"Böyük ehtimalla, Putinin yerinə gələn istənilən şəxs bir müddətdən sonra Ukraynaya qarşı işğalçı müharibəni dayandırmaq məcburiyyətində qalacaq"

"Qərb ölkələrinin və Ukraynanın kəşfiyyat strukturları tez-tez belə xəbərlər yayırlar ki, Rusiya prezidenti Vladimir Putin ağır xəstəliyə düçar olub və yaxın müddətdə həyatıyla vidalaşacaq. Əlbəttə, bu xəbərlərin yayılması işğalçı dövlətin hakim strukturları içərisində təfriqə yaratmaq məqsədilə psixoloji savaşın tərkib hissəsi kimi qiymətləndirilən bilər. Ancaq hesab edək ki, yayılan xəbərlər həqiqətə uyğundur, bu halda hadisələr necə inkişaf edəcək, kobud desək, Rusiya prezidenti vəfat edərsə, bunun Ukraynadakı müharibəyə hər hansı təsiri olacaqmı? Putin sağlığıyla bağlı ciddi problemlərin olduğunu anlayarsa özünə varis seçməyə tələsəcək". Hurriyyet.az xəbər verir ki, bu fikirlər "Atlas" Araşdırmalar Mərkəzinin rəhbəri, politoloq Elxan Şahinoğluna məxsusdur.

Politoloqun sözlərinə görə, Putin elə bir varis seçmək istəyəcək ki, Ukrayna ilə müharibəni davam etdirsin: "Ancaq Putinin problemi ondadır ki, o Ukraynaya qarşı işğalçı müharibəni şəxsi intiqam hissi ilə başlayıb. Rusiya hakimiyyətindəki ən mühafizəkar siyasətçilərdən biri belə, Putinin yerinə keçərsə, onun qədər müharibəni əzmlə davam etdirə bilməyəcək. Çünki Rusiya cəmiyyətinin böyük hissəsi Putinin müharibəsinə dəstəyini davam etdirirsə, bu o demək deyil ki, yeni Kreml sahibinin də müharibə strategiyasını dəstəkləyəcək. Həmin şəxs Rusiya cəmiyyətində Putin qədər məşhur olmayacaq".

"Atlas" Araşdırmalar Mərkəzinin rəhbəri hesab edir ki, Kremldəki məcburi yerdəyişmə Ukrayna ordusunu daha böyük əks-hücumlara həvəsləndirəcək: "Ona görə də böyük ehtimalla, Putinin yerinə gələn istənilən şəxs bir müddətdən sonra Ukraynaya qarşı işğalçı müharibəni dayandırmaq məcburiyyətində qalacaq. Ancaq Ukrayna üçün bu azdır, Kremlin yeni sahibindən işğal edilən torpaqlardan, o cümlədən Krımdan çıxmaq tələb ediləcək".

Vazeh BƏHRAMOĞLU,

Hurriyyet.az


Ada Studiya

Ailə, uşaq, fərdi, hamilə, cütlük və ad günü çəkilişləri.
Əlaqə: 0557949055
İnstagram: _ada_studio
Tiktok: adastudiya


Load Time (S) : 0.221809