Ölməzliyə  qovuşan qəhrəman - Şəhid Elçin Novruzovun anım günü qeyd olundu

“Mən həyatımı çəkəcəkdim”. Masallı-Tarix Diyarşünaslıq Muzeyində baş tutan eyniadlı tədbir  Vətən müharibəsinin şəhidi Elçin Qismət oğlu Novruzovun  anım gününə həsr  edilmişdi. Muzeyin, Mərkəzi Kitabxana, eləcə Gənclərin İnkişaf və Karyera Mərkəzinin Lənkəran-Astata Regional nümayəndəliyi Masallı bölməsinin birgə təşkilatçılığı sayəsində baş tutan anım tədbirinə təşkilatçı müəssisələrin əməkdaşları və gənclər qatılmışdı.

Vətənin azadlığı və bütövlüyü uğrunda canından keçən bütün şəhidlərin əziz xatirəsi bir dəqiqəlik sükutla anıldı, ardınca ilk söz alan  muzeyin direktoru Əntiqə Tağıyeva Azərbaycan Respublikasının ərazi bütövlüyünün təmin olunması uğrunda döyüş əməliyyatlarında iştirak etmiş, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirmiş Silahlı Qüvvələrin əsgəri  Elçin Qismət oğlu Novruzovun həyat və döyüş yolu haqqında geniş məlumat verərək dedi: - Ölməzliyə  qovuşan, şanlı tariximizin qəhrəman oğlu Elçin Novruzov 1989-cu ildə Rusiyanın Voronej şəhərində anadan olub. Masallıya gələrək 2007-ci ildə  Ə. Məmmədov adına Öncəqala kənd orta  məktəbini bitirib. Vətən müharibəsində könüllü olaraq  iştirak edən Elçin Füzulinin  azad edilməsi uğrunda  gedən  ağır döyüşlərdə vuruşub.  Düşmənə qan uddurub, onlarla canlı qüvvəsini, hərbi texnikasını məhv edib.  Elə burada şəhadətə ucalıb. 16 noyabr 2020-ci ildə Masallının Hüseynhacılı kəndində torpağa tapşırılıb. Ölümündən sonra  “Vətən uğrunda”, “Döyüşdə fərqlənməyə görə” və digər  medallara layiq olub.  Elçin mənən qəlblərdə  yaşayacaq, hər an xatırlanacaq...

Söz şəhidin anası Şəhrəbanu xanıma çatanda o, övladı ilə qürur duyduğunu dedi, bütün şəhid ailələrinə göstərilən diqqət və qayğıya görə dövlət başçısı İlham Əliyevə, Azərbaycan xalqına razılığını söylədi.

Prezident İlham Əliyevin və qəhrəman Vətən övladlarının  qətiyyəti sayəsində 30 il yağı tapdağının altında qalan müqəddəs yurd yerimiz  Qarabağın  düşmən işğalından azad edilməsi, ölkəmizin həyatında yeni mərhələnin və inkişaf dövrünün əsasını qoyduğunu vurğulayan  kitabxananın  baş biblioqrafı Günay Xəlilova, muzeyin elmi işçisi Dilguşə Məmmədova onu da qeyd etdilər ki, vətənpərvərlik ruhunu yüksəltmək, gənc nəslin tariximizə dair biliklərini möhkəmləndirmək, Vətənin bütövlüyü uğrunda canından keçmiş Azərbaycanın igid oğullarının xatirəsini əbədiləşdirmək üçün belə təşəbbüslərin əhəmiyyəti olduqca böyükdür.

Sonda tədbirin iştirakçıları şəhid Elçin Novruzovun muzey fondunda qorunan şəxsi əşyaları ilə tanış oldular və  xatirə şəkilləri çəkdilər.

Zəfər ORUCOĞLU