Odesaya gecə hücumu: dəmir yolu zədələndi, stansiya işçisi yaralandı

Hurriyyet.az xəbər verir ki, 19 dekabr gecəsi Rusiyanın Odesaya hücumu zamanı şəhərin dəmir yolu infrastrukturu zədələnib. Bir stansiyada xidmət məntəqəsi dağıdılıb və bir nəfər dəmir yolu işçisi yaralanıb.

Bu barədə "Ukrzaliznitsa" İdarə Heyətinin sədri Oleksandr Pertsovski məlumat verib.

Onun sözlərinə görə, qadın qəlpə yarası alıb və dərhal xəstəxanaya yerləşdirilib.

Şirkətin baş direktoru qeyd edib ki, xəsarət həyati təhlükə yaratmır, lakin həkimlər cərrahi müdaxilə aparırlar.

"Həmkarımız dərhal xəstəxanaya aparılıb. Zədə kritik deyil, amma onlar əməliyyat keçirirlər. Onun tez sağalması üçün əlimizdən gələni edəcəyik", - deyə o yazıb.

Qeyd edək ki, Rusiya qoşunları Odesa bölgəsində mülki hədəflərə və sakinlərə zərbələr endirməyə davam edir. 13 dekabr gecəsi baş verən kütləvi hücumdan sonra minlərlə sakin elektriksiz qalıb ki, bu da istilik təchizatına mane olur.

19 dekabr gecəsi baş verən kütləvi atəş nəticəsində Odesadakı vacib infrastruktur hücuma məruz qalıb. Bundan əlavə, partlayış dalğası yaşayış məntəqələrində dağıntılara səbəb olub və mülki evlərə ziyan vurub.

NURAY