"Növbəti seçkilərdə AKP-nin iqtidarı itirməsi çox yüksək ehtimaldır" - NATİQ CƏFƏRLİ

2022-06-03 11:40:00

"Ona görə də Azərbaycan dövlət olaraq bir qoldan, müxalif institutlar isə digər qoldan potensial iqtidar təmsilçiləri ilə indidən təmaslar qurmalı, müzakirələr aparmalıdır"

"Qardaş Türkiyədə qiymət artımları, inflyasiya sürətlənib, iqtisadi və sosial problemlər artır. Son günlərdə məişətdə işlədilən təbii qazın qiyməti 30% artırıldı, indi bir m3 qazın dəyəri 3 lirə 64 kuruş, yəni 38 qəpik oldu. Bundan başqa, elektrik enerjisi almaq üçün istifadə edilən qazın qiyməti artdı, bu isə növbəti günlərdə elektrik qiymətlərini artıracaq, sənayədə istifadə edilən qazın qiyməti də 40% artıb. Deməli, sənaye məhsullarının qiyməti də kəskin artacaq". Hurriyyet.az xəbər verir ki, bu fikirlər Respublikaçı Alternativ Partiyasının (REAL) icra katibi, politoloq Natiq Cəfərliyə məxsusdur.

Hazırda Türkiyədə benzinin 26 lirə 23 kuruş, dizelin isə 25 lirə 94 kuruş olduğunu vurğulayan politoloq qeyd edib ki, son bir ildə benzinin qiyməti 239%, dizelin qiyməti isə 258% artıb, ölkədə rəsmi inflyasiya 70%-ə yaxınlaşıb ki, bu da dünyada ən yüksək rəqəmlərdən biridir: "Türkiyədə seçkilərə (erkən seçkilər olmasa) cəmi 1 il qalıb, bu müddət ərzində iqtisadi və sosial vəziyyətin düzəlməsi çox çətin görünür. Türkiyə seçicisi nə qədər ideoloji olsa da, sonda soyuducusuna, dolanışığına baxıb səs verir. Bunu nəzərə alsaq, növbəti seçkilərdə AKP-nin iqtidarı itirməsi çox yüksək ehtimaldır, ona görə də Azərbaycan dövlət olaraq bir qoldan, müxalif institutlar isə digər qoldan potensial iqtidar təmsilçiləri ilə indidən təmaslar qurmalı, müzakirələr aparmalıdır. Bu gün iki ölkə arasında olan çox yaxşı, çox yaxın münasibətlər şəsxlər üzərində inşa edilməkdən çıxıb institutlaşmalıdır. Keçən ilin sonunda Ankarada Türkiyə müxalif partiyalarının bir neçəsi ilə təmaslarım oldu, Azərbaycanı sevirlər, amma açığı tanımırlar, bölgə siyasəti ilə bağlı aydın təsəvvürləri yoxdur. Bir qismi “anti-imperialist” kimi danışır, amma ancaq Qərbi “imperialist” kimi görür, Rusiyaya simpatiya ilə baxanlar da var, az deyil və nə qəribədir ki, Rusiyanı “imperialist” kimi görmürlər, ya da, görmək istəmirlər".

REAL-ın icra katibi hesab edir ki, Azərbaycanın varolma strategiyasının əsas istiqaməti Türkiyə ilə əlaqələrin maksimal dərəcədə yüksəldilməsindən keçir: "Bunu nəzərə alaraq Türkiyədə gələcək seçimlərin müxtəlif nəticələrini nəzərə alan strateji addımlara ehtiyac yaranıb. Məhz bu gündən seçkilərin istənilən nəticələrinə cavab verən əməkdaşlıq konsepsiyasının tezisləri hazır olmalıdır".

Vazeh BƏHRAMOĞLU,

Hurriyyet.az


Ada Studiya

Ailə, uşaq, fərdi, hamilə, cütlük və ad günü çəkilişləri.
Əlaqə: 0557949055
İnstagram: _ada_studio
Tiktok: adastudiya