“Moskva Emin Əmrullayevin sözündən yapışıb deyə bilər ki...”

2022-08-26 09:07:00

“Moskva Emin Əmrullayevin sözündən yapışıb deyə bilər ki...”

“Elm və təhsil nazirinin rus sektoru ilə bağlı dediklərində bir sıra strateji problemlər görünür. Nazirin imkan məhdudiyyətini dilə gətirməsi Rusiya üçün fürsətlər açır. Sabah Moskva nazirin sözündən yapışıb deyə bilər ki, rus dilində təhsilə tələbat çox, imkanınız azdırsa, gəlin biz yardım verək, nə qədər lazımdır, o qədər rusdilli müəllim işə götürüb yeni siniflər açın. Azərbaycan bu yardımdan imtina etsə, rus mediası ölkəmizi qaralamağa bəhanə qazanacaq. Hörmətli nazirimiz siyasətçi kimi deyil, yönətici kimi danışdı. Bu isə, indiki Azərbaycan nazirlərinə ümumən xas cəhətdir, çünki o vəzifəyə siyasi davalarda bərkiyərək gəlməyiblər”.

Hurriyyet.az bildirir ki, bunu REAL Partiyanın sədri İlqar Məmmədov bildirib.

İ. Məmmədov hesab edir ki, valideyn uşağını rus sektoruna yalnız məktəbdəki dərsdən ötrü vermir: “Məktəbdən kənardakı ədəbiyyatda, elmi-mədəni və ictimai həyatda uşağın qavrayacağı bilgilər həmin valideyn üçün daha dəyərlidir. Dünya görüşü ilə seçilən heç də əzbərçi, ya da əlaçı şagird deyil, kritik düşüncəyə malik şagirddir. Azərbaycan sektoru riyaziyyat, kimya, bir sıra başqa sahələrdə əla, hətta üstün təhsil verir, uşaqlar beynəlxalq Olimpiadalarda qalib gəlir, amma valideynlərin çoxu üçün bu, uşağın ətraf aləmi kritik qavramaq qabiliyyətindən daha az önəm daşıyır. Rus, ingilis, son onilliklərdə isə Türk dilindəki ədəbiyyatın, filmlərin, mədəni və ictimai-siyasi müzakirələrin sərbəstlikdən doğan zəkalı rəngarəngliyi Azərbaycan ictimai sahəsinin solğunluğu ilə təzaddadır. Niyə? Çünki hökumət 30 ildir elə bilir ki, hüquq-mühafizə qorxutması əsasında ölkəni idarə etməklə, bir kəlmə sərbəst söz demiş, ya da siyasi fəallıq göstərmiş gəncin üstünə əməliyyatçı göndərib onunla kafedə çay masasında həyat haqqında sakit, amma vahimələndirən söhbət etməklə milləti ağ günə çıxarmaq olar. Xeyr, adamlar ruhən qorunmaq üçün uşaqlarını bax beləcə xarici dil sektoruna daxili mühacirətə göndərəcəklər. Rus sektoruna tələbatın bu qədər yüksək, yerlərin isə az olması Azərbaycan şəraitində hansı heyvanın boynundan asılmış xəbərçi zınqırovdur? Bəli, həm də korrupsiya kimi sağmal inəyin. Kimin pulu ya da tanışı varsa, uşağını tələbatın daha yüksək olduğu sektora yazdıracaq. Buna qarşı mübarizə açılsa, rüşvəti təkcə direktor yox, həm də müstəntiq yığacaq, yəni qiymət bahalaşacaq, vəssalam. Pul və tanışlıqla formalaşan sektor təbii qaydada çevrilir olur kasta. İmtiyazlı və qapalı çevrə. Beləliklə, sosial ziddiyyətlər daha bir müstəvi qazanır. Müstəqilliyimizin 31-ci ilində rus sektoruna tələbatın yüksəkliyinə görə hörmətli Elm və təhsil nazirini irəli verib ondan cavab istəmək ədalətsizlikdir. Sorğulanası adamlar yuxarıda təsvir etdiyim acı gerçəkliyə görə məsuliyyət daşıyanlardır”.

yenisabah.az


Ada Studiya

Ailə, uşaq, fərdi, hamilə, cütlük və ad günü çəkilişləri.
Əlaqə: 0557949055
İnstagram: _ada_studio
Tiktok: adastudiya


Load Time (S) : 0.058345