Saat:03:18
Haqqımızda

“Mən də daxil olmaqla qoca deputatların hamısını...” - Qalmaqallı sözlər

2024-05-14 13:03:35

“Mən də daxil olmaqla qoca deputatların hamısını...” - Qalmaqallı sözlər

Son günlər gündəmi zəbt edən əsas mövzulardan biri də Azərbaycanda yeni parlament seçkilərinin nə vaxt keçiriləcəyidir. Yayılan məlumatlar bu prosesin çox da uzaqda deyil, yaxın 2-3 ay ərzində baş tutacağını söyləməyə əsas verir. 

İddialara görə, hakimiyyət yeni parlamentin daha gənc və dinamik şəxslərdən formalaşmasında maraqlıdır. Ona görə də hakim partiyanın siyahısının xeyli "gəncləşəcəyi" gözlənilir. 

Belə ki, yaşı 70-i ötmüş, hamısı olmasa da, bir çox köhnə simaların deputat mandatı ilə vidalaşacağı da iddialar sırasındadır. 

Məsələ ilə bağlı Yenisabah.az Milli Məclisin yaşı 70-i ötmüş deputatları ilə əlaqə saxlayıb.

Millət vəkili Vahid Əhmədov açıqlamasında bildirib ki, dünya təcrübəsində belə ənənə yoxdur:

“Bu xəbərlər qeyri-rəsmidir, günlərdir ki, bu barədə mətbuat yazır. Mətbuatın yazdığı, rəsmi olmayan iddialarla bağlı nə isə demək olmaz. Mənim bu haqda məlumatım yoxdur. 

Deputat olmaq üçün yaş o qədər də əhəmiyyət kəsb etmir. Dünyada belə bir təcrübə yoxdur, mən buna rast gəlməmişəm. Əsas odur ki, deputat olmaq istəyən şəxs seçkilərdə səs toplaya bilsin, seçicilərlə işləməyi bacarsın. Onların problemlərinin həllinə kömək etsin, deputatın əsas işi budur. Mən də əlbəttə ki, cavanlaşmanın tərəfdarıyam. 2020-ci il parlament seçkilərində Milli Məclisə xeyli cavanlar gəldi. Onların arasında hörmət etdiyim kifayət qədər insan var, amma yaşlılara da ehtiyac var, çünki onlar təcrübəlidirlər. Yazılan iddiaların gerçək olub-olmayacağını isə zaman göstərəcək. Bu barədə hələ ki, Mərkəzi Seçki Komissiyasının qərarı yoxdur. Hər şey bundan sonra məlum olacaq. 

Mən özüm isə bu dəfə nazmizədliyimi irəli sürüb-sürməyəcəyim barədə hələ ki, qərar verməmişəm”. 

Millət vəkili Aqil Abbasın səsləndirilən iddialara reaksiyası isə ironik olub:

“İçində mən olmaq şərti ilə yaşı 70-i ötmüş bütün deputatları bir yerə yığıb güllələmək lazımdır. Deputatı xalq seçir, bu seçimdə yaşa fikir verilmir. Mən də istəyərəm ki, parlamentə gənclər gəlsin, amma onları xalq seçir. Seçici deputatın yaşına, başına, savadına baxmır. Bunu xalqdan soruşmaq lazımdır ki. 70-dən yuxarı yaşı olanları seçəcəksiniz, ya yox? Dünya təcrübəsində də belə bir şey yoxdur. 

Görünür, bəzi adamların qocaman deputatlardan - yaşı 70-i keçənlərdən zəhləsi gedir”.

Məlumat üçün qeyd edək ki, hazırda Milli Məclisdə təmsil olunan 125 deputatın 21-i 70 yaş və üzərindədir. 

1954-cü ildə istehsal olunan “Qaz 12” SATILIR – ONDAN XRUŞOV DA İSTİFADƏ EDİB / FOTOLAR

Load Time (S) : 0.246878