Məhkəmə Əvəz Zeynallını həbsdə saxladı

2023-01-06 17:45:00

Məhkəmə Əvəz Zeynallını həbsdə saxladı

Yanvarın 5-də Bakı Apelyasiya Məhkəməsində “Xural TV” internet televiziyasının rəhbəri Əvəz Zeynallı haqqında həbs qətimkan tədbirinin müddətinin uzadılması haqda qərardan verilmiş şikayətə baxılıb. Dekabrın 29-da Binəqədi Rayon Məhkəməsi prokurorluğun təqdimatını təmin edərək, Əvəz Zeynallı haqqında istintaq dövrü üçün həbs qətimkan tədbirinin müddətini daha üç ay (aprelin 8-nə qədər) artırıb. Apelyasiya şikayəti də həmin qərardan verilib.

Hurriyyet.az Meydan TV-yə istinadən xəbər verir ki, şikayətə Bakı Apelyasiya Məhkəməsinin hakimi Habil Məmmədovun sədrliyi ilə baxılıb.

Qapalı keçirilən məhkəmə iclasında Əvəz Zeynallı özü də iştirak edib. Sifarişlə həbs olunduğunu vurğulayan “Xural TV” rəhbəri heç bir cinayət törətmədiyini deyib.

Onun vəkili Rəşad Əliyev bildirib ki, Əvəz Zeynallı haqqında həbs qətimkan tədbiri seçilməsi üçün əsas yoxdur. Vəkilin sözlərinə görə, hüquqlarını müdafiə etdiyi şəxs haqqında alternativ qətimkan tədbiri seçməklə də istintaqı aparmaq olar. Rəşad Əliyev əmindir ki, Əvəz Zeynallının azadlıqda qalması istintaqın gedişinə heç bir təsir göstərməyəcək.

Lakin məhkəmədə iştirak edən prokurorluq təmsilçisi bununla razılaşmayıb və Əvəz Zeynallının həbsdən buraxılmasına etiraz edib. O bildirib ki, onun azadlıqda qalması istintaqın gedişinə mane ola bilər.

Apelyasiya məhkəməsi şikayəti təmin etməyib – Binəqədi Rayon Məhkəməsinin qərarı qüvvədə saxlanılıb.

Qeyd edilib ki, hazırda Dövlət Təhlükəsizliyi Xidmətinin (DTX) istintaq təcridxanasında saxlanılan Əvəz Zeynallı sentyabrın 10-da Cinayət Məcəlləsinin 311.3.3 (külli miqdarda rüşvət alma) maddəsilə həbs edilib. Sentyabrın 21-də ona qarşı Cinayət Məcəlləsinin 312-1.1 (vəzifəli şəxsin qərarına qanunsuz təsir göstərə – nüfuz alveri) maddəsilə yenidən ittiham elan edilib. Rüşvət ittihamı “Baku Steel Company” MMC – poladəritmə zavodunun keçmiş rəhbəri Rasim Məmmədovla bağlıdır. “Xural TV” rəhbəri 2021-ci ilin yanvarından həbsdə olan Rasim Məmmədovun ailəsindən onun əleyhinə materiallar yaymamaq üçün 20 min manat pul almaqda ittiham olunur.

Əvəz Zeynallı ona qarşı irəli sürülmüş ittihamların heç birini qəbul etmir. O, sifarişlə həbs edildiyini bildirir. “Xural TV” rəhbərinin sözlərinə görə, onu jurnalist fəaliyyətinə, tənqidlərinə görə cəzalandırmaq üçün belə ssenarilər qurulur. Sentyabrın 10-da Əvəz Zeynallı ilə yanaşı, vəkil Elçin Sadıqov da eyni cinayət işi üzrə həbs olunub. O, Rasim Məmmədovun vəkili idi. Elçin Sadıqov rüşvətə vasitəçilikdə ittiham olunur. Elçin Sadıqov sentyabrın 17-də Bakı Apelyasiya Məhkəməsinin qərarı ilə ev dustaqlığına buraxılıb. Elçin Sadıqov da özünü təqsirli bilmir, həbsini peşə fəaliyyətilə əlaqələndirir. Onun sözlərinə görə, həbsinin əsl səbəbi ictimai-siyasi fəalların hüquqlarını müdafiə etməsidir.


Ada Studiya

Ailə, uşaq, fərdi, hamilə, cütlük və ad günü çəkilişləri.
Əlaqə: 0557949055
İnstagram: _ada_studio
Tiktok: adastudiya


Load Time (S) : 0.173149