"Kremllə Ağ Ev arasındakı rəqabət bizə sərf edir, çünki..." - KƏNAN NOVRUZOV

2023-01-20 13:13:00

"Moskva və Vaşinqton vasitəçilik təşəbbüslərilə məqsədlərinə nail olmaq istəyirlər, əlbəttə, ikisi də qeyri-səmimidir"

"ABŞ Dövlət Departamentinin sözçüsü Ned Prays bildirib ki, Ağ Ev Ermənistanla Azərbayan arasında konstruktiv dialoqun təmin olunmasını istəyir. Onun sözlərinə görə, ABŞ əvvəllər olduğu kimi, indi də üçtərəfli formatı davam etdirməyə hazırdır: "ABŞ dövlət katibinin Qafqaz üzrə baş məsləhətçisi Filipp Riker təqaüdə çıxıb. Amma Dövlət Departamentində prosesdə dərindən iştirak edən insanlar var. Onlardan biri də dövlət katibi Entoni Blinkenin özüdür". Rəsmi Vaşinqton əvvəllər də dəfələrlə oxşar bəyanatlarla çıxış edib". Hurriyyet.az xəbər verir ki, bunu Beynəlxalq Münasibətlər və Diplomatiya Araşdırmaları Mərkəzinin eksperti Kənan Novruzov qeyd edib.

Bu gün Cənubi Qafqaz uğrunda Rusiya ilə ABŞ arasında mübarizənin getdiyini vurğulayan siyasi ekspert bildirib ki, tərəflər əvvəl regiondakı mövcudluqlarını gücləndirmək üçün Ermənistanla Azərbaycan arasındakı konfliktdən istifadə edirlər: "İkinci Qarabağ müharibəsindən sonra yeni reallıqlar yarandı. İndi həm Moskva, həm də Vaşinqton vasitəçilik təşəbbüsləri ilə məqsədlərinə nail olmaq istəyirlər. Əlbəttə, ikisi də qeyri-səmimidir. Biz onların qulağaxoş bəyanatlarına "toxuq". Əgər Rusiya və ABŞ, həqiqətən regional sabitlikdə maraqlı olsaydılar, ATƏT-in həmsədri kimi fəaliyyət göstərdikləri illər ərzində münaqişənin həllinə nail olur, müharibənin başlanmasına şərait yaratmazdılar. Bu mənada, biz tarixi təcrübədən dərs çıxarmalıyıq".

Kreml ilə Ağ Ev arasındakı rəqabətin bizə sərf etdiyini deyən ekspertin fikrincə, rəsmi Bakı hazırkı situasiyadan öz xeyrinə istifadə edə, tərəflərdən birinin təsir gücünü digəri vasitəsilə neytrallaşdıra bilər: "İndi ABŞ-la Rusiya arasında mübarizə daha gərgin səviyyədədir. Vaşinqton bir çox bölgədə, eləcə də Cənubi Qafqazda Moskvanın təsirini azaltmağa çalışır. Bu isə o deməkdir ki, səslənən bəyanatlarda müəyyən həqiqilik payı var. ABŞ başa düşür ki, Azərbaycan regionun aparıcı "oyunçusu"dur. Ona görə də Vaşinqton Bakı ilə münasibətləri pisləşdirmək istəməz. Biz bu məqamları nəzərə alaraq, regional maraqlarımızın təmin olunmasında, o cümlədən sülh müqaviləsi üçün Ermənistana təzyiq göstərilməsində Ağ Evin təşəbbüslərindən istifadə edə bilərik".

Vazeh BƏHRAMOĞLU,

Hurriyyet.az


Ada Studiya

Ailə, uşaq, fərdi, hamilə, cütlük və ad günü çəkilişləri.
Əlaqə: 0557949055
İnstagram: _ada_studio
Tiktok: adastudiya


Load Time (S) : 0.150693