Kreditlər daha çox hansı sahəyə ayrılır? - Əhalinin borcu artmaqda davam edir

2022-04-22 13:12:00

Kreditlər daha çox hansı sahəyə ayrılır? - Əhalinin borcu artmaqda davam edir

Azərbaycanda banklar və digər kredit təşkilatları tərəfindən 18 milyard manatdan çox kredit verilib.

Hurriyyet.az bildirir ki, ayrılan kreditlərin daha çox hissəsini ev təsərrüfatları alıb.

2022-ci ilin aprelin 1-nə olan məlumata əsasən, bütün kreditlərin 51,4 faizi, yəni 9,26 milyard manatı əhaliyə ayrılıb.

Rəsmi məlumatlardan bəlli olur ki, əhaliyə verilən kreditlərin həcmi və ümumi kredit qoyuluşunda payı davamlı artır. Belə ki, bir il əvvəl ev təsərrüfatlarının 6,87 milyard manat kredit borcu var idi və bu məbləğ ümumi kreditlərin 46,6 faizini təşkil edirdi.

2016-cı ildə əhalinin kredit borcu daha az olub. Həmin dövrdə əhalinin borcu 5,86 milyard manat idi və bütün kreditlərin 35,6 faizini formalaşdırırdı.

Əhalinin kredit borclarının artması bir sıra xərclərin ödənilməsinin asanlaşdırılması baxımından əhəmiyyətlidir. Xüsusən də iri məbləğli istehlak xərclərinin ödənilməsində kreditlər köməkçi vasitədir.

Amma nəzərə alaq ki, əhalinin istehlak üçün aldığı kreditlər əsasən idxal mallarının əldə edilməsinə yönəldilir. Kreditlərlə elektron avadanlıqlar, məişət avadanlıqları, avtomobillər və sair bu kimi mallar alınır. Həmin malların əsas hissəsi idxal edildiyindən istehlak kreditləri dolayı şəkildə idxalı artırır.Buna görə də bir sıra ekspertlər əhaliyə verilən kreditlərin məbləğinin artmasının makroiqtisadi tarazlıq baxımından riskli hesab edir.

Mərkəzi Bankın məlumatına görə, ev təsərrüfatlarının aldığı kredit borcunun 82 faizi istehlak, qalanı biznes məqsədilə götürülüb. Son 2-3 ildə biznes kreditlərinin payı artsa da hələ də istehlak kreditlərinin həcminin daha yüksək olduğu danılmazdır.

Əhalinin xərclərinin artmasını, tələbatın ilbəil genişlənməsini nəzərə alsaq, qarşıdakı dövrlərdə də ev təsərrüfatlarına verilən kreditlərin həcmi artacaq. Bu hal əhalinin borc yükünün bir qədər də ağırlaşmasına səbəb olacaq.

Hazırda əhalinin adambaşına düşən kredit borcu 910 manatdır. Bir il əvvəl adambaşına düşən borcunun məbləği 690 manat, beş il əvvəl isə 465 manat idi.

Sfera.az


Ada Studiya

Ailə, uşaq, fərdi, hamilə, cütlük və ad günü çəkilişləri.
Əlaqə: 0557949055
İnstagram: _ada_studio
Tiktok: adastudiya