İsrail ordusunun Şucaiyyəyə hücumları nəticəsində azı 7 fələstinli həlak olub

Mülki Müdafiə sözcüsü Basal, "İndiyə qədər 7 fələstinlinin cəsədi və onlarla yaralı Qəzzada Əl-Əhli Baptist Xəstəxanasına gətirilib, yollarda və evlərin dağıntıları altında hələ də cəsədlər var" deyib.

İsrail ordusunun havadan bombardmanları və artilleriya hücumları nəticəsində mülki müdafiə qruplarının yaralılara və həyatını itirənlərə çata bilmədiyini ifadə edən Basal, Şucaiyyedə çox sayda insanın İsrail ordusunun mühasirəsində olduqlarını bildirdiyini qeyd edib.

İsrail ordusunun fələstinlilərin qaldığı evlərə raket hücumu təşkil etdiyinə diqqət çəkən Basal, Şucaiyyedə vəziyyətin "çətin və ağrılı" olduğunu bildirib.

İsrail ordusu səhər saatlarından etibarən Şucaiyyeyə intensiv artilleriya və hava hücumları ilə eyni vaxtda qurudan məhəlləyə girməyə çalışır.

İsrail ordusu Qəzza şəhərinin şərq rayonlarının boşaldılmasını istəyib və fələstinlilərdən Şucaiyye, əl-Türkman və əl-Tuffah məhəllələrini boşaltmağı tələb  edib.

Digər tərəfdən, hadisə şahidləri İsrail ordusunun intensiv hücumlarına başlamazdan əvvəl heç bir xəbərdarlıq etmədiyini bildirib.

İsrail ordusu fələstinliləri Qəzza zolağının müxtəlif bölgələrində yerlərini boşaltmağa çağıraraq, köçkün etdiyi insanları dəfələrlə hədəfə alıb.

İsrailin 7 oktyabrdan bu yana Qəzza zolağına təşkil etdiyi hücumlarda ən az 15 min 694-ü uşaq və 10 min 279-u qadın olmaqla 37 min 765 fələstinli həyatını itirib, 86 min 429 nəfər isə yaralanıb.

Dağıntılar altında hələ də minlərlə ölü olduğu bildirilərkən, insanların sığındığı xəstəxana və təhsil müəssisələri hədəf alınaraq mülki infrastruktur da məhv edilir