İran ərazimizə soxulsa, nə baş verəcək? - ŞƏRH
"İran Azərbaycanla güc yolu ilə danışmaq istəyir”.
Son zamanlar İranın Azərbaycana qarşı təxribatları artıb. Xüsusən də yanvarda Tehrandakı səfirliyimizə silahlı basqından sonra İran ölkəmizə qarşı təxribatçı fəaliyyətini gücləndirib.
İran sərhəd qoşunlarının komandanı general Əhməd Əli Qudərzinin Azərbaycanla sərhəddə gəlməsi və təhdid xarakterli açıqlamalr verməsi, SEPAH-ın quru qoşunlarının komandanı general Məhəmməd Pakpurun da İran-Ermənistan və İran-Azərbaycan birgə sərhəd bölgələrinə baş çəkməsi, eləcə də Azərbaycanla sərhəddə İran Hərbi Hava Qüvvələrinə məxsus qırıcıların növbəti manevrləri də buna əyani sübutdur.
Görünən odur ki, İran rejimi öz avantüralarını davam etdirir və bu zaman beynəlxalq hüququ pozmaqdan da çəkinmir. Təbii ki, bu, molla rejiminin Azərbaycana qarşı ilk hədə-qorxu dolu addımı deyil. Azərbaycan müstəqillik qazanmasından bu yana İran əlinə düşən hər fürsətdə ölkəmiz əleyhinə iş aparıb, təxribat xarakterli addımlar atıb, riyakar davranışlar nümayiş etdirib.
Məsələyə münasibət bildirən politoloq İlqar Vəlizadə Bakupost.az -a açıqlamasında deyib ki, İran tərəfi Azərbaycanla güc yolu ilə, təzyiqlə danışmaq istəyir. Bu da yolverilməzdir:
“İranın Azərbaycana qarşı məkrli mövqeyi və planları yeni deyil. Sadəcə olaraq, mühafizəkarların hakimiyyəti dövründə bu ritorika daha da güclənir. İranın sabiq mühafizəkar prezidenti Mahmud Əhmədinejadın hakimiyyəti dövründə geosiyasi şərait fərqli idi. Biz o zaman hələ torpaqlarımızı işğaldan azad etməmişdik, prioritetlərimiz də başqa idi. Ancaq indi vəziyyət dəyişib. Azərbaycan ərazi bütövlüyünü təmin etməklə regional gücə çevrilib. Rəsmi Bakı hərbi-siyasi gücünü daha da artırıb. Türk dövlətləri arasında əlaqələr güclənir, müttəfiqlərimiz çoxalır, yeni əməkdaşlıq formatları yaranır. Əlbəttə, İrandakı mövcud rejim bunu başa düşməlidir. Təəssüf ki, onlar reallığı görmürlər. İran xüsusilə daxildə gərginlik, qarşıdurma yaratmaq istəyir”.
Politoloq qeyd edib ki, İran təyyarələrinin sərhədimiz ətrafında uçuş keçirməsinə reaksiya verməsək, qarşı tərəf sərhəd pozuculuğunu genişləndirəcək:
"Bu da yolverilməzdir. Təsəvvür edin ki, İran Azərbaycan sərhədini keçib, ərazimizə soxulsa, nə baş verəcək? Sözsüz ki, bu çox geniş reaksiya doğuracaq. Azərbaycan təsirli cavab verməli olacaq. Bunun üçün bizim bütün imkanlarımız var”.
