İDMAN GÖZƏLLİKDİRMİ?.. – Allahverdi Eminov yazır
![İDMAN GÖZƏLLİKDİRMİ?.. – Allahverdi Eminov yazır](/frontend/uploads/miles/idmanss%20(1).jpg)
Suala müsbət cavabı Sovet dönəmində aldığımı xatırlayıram. Sistem uşaqların və gənclərin beyninə işləmişdi ki, İdman sağlamlıqdır, insanı gumrahlaşdırır, cəsurlaşdırır, iradəli edir və sair. Bu, həqiqətdir! İdman hərəkətdir, orqanizmi xəstəliklərdən qoruyur, ürəyin ritmini normallaşdırır. Bunu klassik pedaqoqlardan J.J.Russo, A.A.Komenski, Con Lokk da etiraf etmişlər. Hələ eramızdan əvvəl Aristotel “Poetika” əsərində yazmışdır ki, gözəllik, sağlamlıq istər müəyyən bir canlıda və ya şeydə məlum hisslərdən ibarətdirsə onda gərək bu hisslər nəinki müəyyən nizamda, həmçinin münasib həcmdə olsun.
Gözəllik nizamdadır. Mən ali məktəblərdə çalışdığım: Otuz il dərs dediyim illərdə də bu mövqeyimdə qalmışam. Lakin vaxt yetişdi “idman – gözəllikdir” anlayışı əvvəlki qüvvəsini itirdi, əsas günah Sovet qanunlarına qarşı yaranan biganəlik, saymazlıq və ciddi təsir altına düşməkdir. Baxılan kinofilmlər, translasiya olunan idman yarışları, xarici ölkələrə səfərlər və s. qazanılan müstəqillik idmanda öz mənfi izini əsaslı şəkildə göstərdi, xüsusilə, qadın idmançılara tətbiq olunan növlər geniş vüsət aldı. Deyək ki, qadınlara sərt idman oyunları qadağan edilmişdi, karate, boks, cüdo xüsusilə nəzarətə alınmışdı. Yarışlar kütləviləşməmişdi, tatami üzərinə ayaq açmamışdı, beynəlxalq yarışların gündəliyinə düşməmişdi. XXI əsr öz gəlişi – girişilə bir sıra bəlalar gətirdi, insanların psixologiyasına ciddi həmlələr etdi, “Mədəni davranış” stixiyasını pozdu, qəddarlıq, amansızlıq, hövsələsizlik və s. adiləşdi. İş o yerə dirəndi, övlad valideyni, valideyn isə balasını qətlə yetirdi. Yeniyetmə – gənclər sərbəstlik həvəsilə böyüklərə qarşı kobudluğa, ötkəmliyə, laqeydliyə yol verdilər. Sinifdə şagirdlər müəlliminin “uşaqlar, sakit olun” xahişinə əhəmiyyət vermədilər, icazəsiz əyləşdiyi partadan durub başqa skamyada oturdular. Hövsələsiz şagirdlər yerindən atılıb lövhəyə tərəf getdilər və ilaxır. Bu qeyri normal davranışlar bu gün məktəblərimizdə adiləşmişdir. İdman müəllimləri öz gücünü şagirdinə tətbiq etməkdən belə, daşınmırlar. Son illər bu hal məktəblərimizdə tez-tez baş vermişdir. Mətləbə qayıdıram: İdmanın sərt növləri nəinki cavan kişilərdə, hətta qızlarda (qadınlarda) adi vərdişə çevrilmişdir. Rəsmi yarışların proqramına karate, cüdo, güləş, boks, futbol idman oyunları daxil edilmişdir. Bəlkə də özümü qınaq hədəfinə verirəm: “Azəri – türk qızlarının belə “amansız” oyunlara kütləvi şəkildə qoşulmasını qeyri – məqbul sayıram. Xarici qızların belə sərt oyunlarda iştirakına adi baxmaq mümkündür və tele – ekranlara baxanda yarışan qızların aqibətinə ikrahla yanaşıram. Görünür, belə idman növlərini proqrama daxil edən qurumlar üçün qadın gözəlliyindən zövq almaq yox, tatami üzərində eybəcər səs çıxarmaq, qışqırmaq, rəqibinin üstünə vəhşicəsinə atılmaq zövq verir. Qadının gözəlliyini şərtləndirən əlamətlər çoxdur: onların saçları, dodaqları, sinələri, qolları, ətli əlləri, simmetrik baldırları və s. tarixən kişiləri özünə bağlamışdır, deyərdim “əsir” etmişdir, məhəbbət hissi oyatmışdır. Vaxtilə yazmışdım ki, qadın (qız) dibçəkdə bitmiş çiçək kimidir, onu vaxtaşırı sulamaq lazımdır. Bəli, qız yuxuda da gözəl görünmək istər. Sərt oyunlar qızları gözəllik taxtından – qadınlığından endirir, onun sanki xarakterini dəyişdirir, kişiləşdirir, axı, kişi qadın deyil ki, bər – bəzəkli görünsün, belə “qadınlaşan” kişiləri zərif xanımlar sevmir! Futbol, boks, ağırlıq qaldıran, əzələ nümayiş etdirən və s. idman növlərinin öhdəsindən gələn qızların “fədakarlığı” alqışa layiq deyil, bunlar zərif cinsə xas olmamalıdır. Bunlar qadın məxluquna yaraşmır, estetikadan daha çox sensasiyaya uymaqdır. Amma bədii gimnastikanı qadına nə qədər yaraşdırırıqsa, bir qədər zərif cinsin ağır idman növlərinə qoşulmasını məqbul saymırıq, məqsədəuyğun hesab etmirik.
Budur 18-20 yaşlı qız tatami üzərində görünür, karate (yaxud cüdo yarışıdır) hər iki rəqibi bir-birinə “düşmən” edir, bir-birinə amansız (!) zərbələr endirirlər, hər zərbədə qıza yaraşmayan çığırtılar eşidilir. Deməli, Oyun qızlara xas titrək, xoş, həlim səsi boğmuşdur, ahəngindən çıxarmışdır. Beləcə, idmandan uzaqlaşandan sonra, ana olandan sonra onun qazandığı nə olacaqdır? Üzr istəyirəm: kobudlaşmış qadın səsi! Qadın səsi kişilərdən fərqli olaraq məlahətilə seçilməlidir, dinləyiciyə xoş təsir bağışlamalıdır. Səs fəryad deyil rəqibini lərzəyə salsın...
Budur, iki növcavan qız tatamiyə çıxmışlar, güləşirlər. Birisi həmkarını üstələmişdir, yerə sərmişdir, o isə hey çabalayır, çırpınır, qılçalarını havada oynadır tamaşaçılar qarşısında. Bəs oyuna baxanlar bu qeyri – normal, etikadan kənar hərəkətlərdən zövq alırlar? Bu zövq deyil, cavan, zərif qızın xalça üzərində kobudlaşmış hərəkətidir, o, sürünür, çırpınır qızın – gələcək ananın bədənini haldan hala salması nəyi vəd edir? Bu, ancaq fiziki hərəkətdir, bəs daxilən, ruhən hansı hissləri keçirir? Təsəvvür etmək çətindir...
Budur, 22 qız stadionda görünürlər, futbol oynayırlar, topa zərbələr endirirlər, sanki bu zaman kişiləşirlər. Axı, bu qızlar zərif məxluqlardır, onlar isə fənd işlədir, torpağa sərilir, ayaqları zədələnir, saçları səliqəsini itirir və ilaxır. Məşhur futbolçu Pele “qadın futbolu”nu eşidərkən çiyinlərini çəkib demişdir: “Qadınlar öz təbiətləri etibarilə zərif və kövrəkdilər, futbol kişilər üçün yaranmışdır”. Paradoks o oldu: Pelenin qızı dünyada məşhur futbolçu oldu!
Gözəlliyə xələl gətirmək günahdır, qadın xüsusilə, təbii – fiziki gözəlliyi qoruyub saxlamalıdır, bu gözəllik onun yaradıcılıq zirvəsidir. V.Şekspir əbəs deməmiş ki, gözəllik danışmağa başlayanda bütün natiqlər susur...
Budur, iki zərif qız rinqə çıxmışlar, qəşəng əlləri əlcəkdədir,barmaqlar sanki donmuşdur. Rəqiblər bir-birinə yumruq atırlar, zərbə rəqibin qaşını partladır, gözləri qapanır. Dodaqlarından qan sızır. Düzü, qızların boks döyüşlərinə baxanda ürəyim ağrıyır, xüsusilə, şərqli qızların, müsəlman ailəsində doğulan və tərbiyə alanların belə eybəcər hala düşməsini bağışlaya bilmirəm. Daha Qərblə Şərqin fərqi harada qaldı? Amansız təkbətək döyüşdə gözəlliyi, məlahətliyi, sağlamlığı özündə ehtiva edən üz – çöhrəsi nə vaxt sağalacaqdır? Belə qızlar unudur ki, sabah bir oğlanın sevgisi ola bilər, birisi gün isə Ana, övlad sahibi.
Boks döyüş növüdür, iki tərəfin əlbəyaxa mübarizəsidir, gözəlliyi rinqdə itirmək deyil!
Qızlar (qadınlar) üçün məgər azmı idman növləri vardır: volleybol, gimnastika, basketbol, tennis, əltopu, dama, şahmat və s. bunlar da sağlamlığa zəmanət verir, gözəlliyi qoruyur, qadın vücudunu simmetriyasını – ahəngini saxlayır. Qızlar – gələcək qadınlar – analar şöhrətpərəstliyə, mukafatlara, vəzifələrə aludə olub sərt, deyərdim ki, amansız döyüş ruhlu idman növlərindən uzaq olmalıdır, indiki – mövcud məlahətin qayğısına qalmalıdır, xalçada, rinqdə, meydanda zərifliyini itirməməlidir, elastik bədənini ikrah doğuran vəziyyətlərə gətirməməlidir. Vaxtilə, Şərqdə qızların fiziki tərbiyəsi diqqət mərkəzində olmuşdur: at çapmışlar, şahmat oynamışlar, qılıncla məşq etmişlər və sair oyunlar onları bir növ düşmənlə döyüşə hazırlıq məqsədi daşımışdır, intellektuallığa xidmət göstərmişdir, tamaşaçılar estetik zövq almışlar, daha qızların gözəlliyinə xəyanət edən idman oyunlarına rəvac verməmişlər.
Qadın məxluqu var olan məkanda yalnız gözəllik barədə düşünməliyik, qadını solmağa, məlahətini itirməyə imkan verməməliyik. Onun sağlam çöhrəsi gül ləçəyinə bənzər, onu yarpaqla vursaq, bu, qadını təhqir etmiş olarıq.
Məşhur Şərq şairi Naseh (1865-1914) bir şeirində yazmışdır:
Qadın bir jalədir kim, düşsə
gül üstə olur incu,
Əgər nacis ələ düşsə olur
bir cəfa tək bədbu.
Qadın bir tək gülə bənzər –
sıxılmaqdan solar gül tək,
Zərif əllərdə saxlansa
soluxumaz, həm verər xoş bu.
Sual cavabımda yanılmamışam ki!?
![](/frontend/uploads/files_son/QAZ12.jpg)