Hindistanda qara ritual - direktorla müəllimlər həbs edildilər

Hurriyyet.az xəbər verir ki, Hindistanın Uttar-Pradeş ştatında özəl məktəbin rəhbərliyi və müəllimləri məktəblini ritual üçün öldürməkdə ittiham edilirlər. Bu barədə "Ekonomik Tayms" nəşri məlumat verib.
Hadisə sentyabrın 23-də Hathras şəhərində baş verib. Polis müəllimləri və direktoru ritual qətldə şübhəli kimi həbs edib. Kişilər 11 yaşlı oğlanı oğurlayaraq "qara magiya" ritualı keçiriblər. Məqsəd guya məktəbə "uğur gətirmək" olub.
Oğlanın yataqxananın otaqlarından birində boğulduğu güman edilir. Uşağın cəsədini sinif yoldaşları tapıblar. Təhsil müəssisəsinin administrasiyası cinayəti ört-basdır etməyə çalışaraq, valideynlərə guya uşağın vəziyyətinin pisləşdiyini bildiriblər.
Polis direktoru, onun qohumunu və 3 nəfər müəllimi həbs edib. İstintaq və axtarış zamanı müxtəlif ritual əşyaları aşkar edilib. Şübhəlilərin bundan əvvəl başqa bir məktəblini - doqquz yaşlı oğlanı da öldürməyə cəhd göstərdikləri bəlli olub. Özəl məktəb artıq bağlanıb, onun işində çoxsaylı qanun pozuntuları aşkar edilib. 
Qətlə yetirilmiş uşağın valideynləri müqəssirlərə edam cəzası verilməsini tələb edirlər. Hindistanda ölüm hökmü ləğv edilməyib.
Hürr Tərcüman