Saat:14:59
Haqqımızda

"Finlandiya Rusiya ilə fəsadları ağır olacaq bir macəraya girmək istəmir" - TURAN RZAYEV

2022-07-01 14:07:00

"Rusiya əslində Finlandiya və İsveçin NATO-ya üzv olmasına qarşı deyil, Kreml sadəcə NATO qüvvələrinin bu ölkələrə, daha doğrusu Rusiya sərhədinə gətirməsinə qarşıdır"

"Məlum olduğu kimi, bir müddət öncə Rusiya prezidenti Vladimir Putin NATO hərbi infrastrukturunun İsveç və Finlandiyada yerləşdirilməsi halında buna adekvat cavab verməyə məcbur olacağını deyərək, hər iki ölkəni xəbərdar etmişdi. Görünür, Putinin bu xəbərdarlığı öz nəticəsini verir. Belə ki, Finlandiyanın xarici işlər naziri Pekka Haavisto hazırda Finlandiyada NATO qüvvələrinin yerləşdirilməsinə ehtiyacın olmadığını bildirib. Haavisto fikirini belə əsaslandırıb: "NATO-nun kollektiv təhlükəsizliyinin təmin edilməsi planlarını dəstəkləyirik. Finlandiyanın Rusiya ilə ümumi sərhədi var və indi ora təhlükəsizdir". Hurriyyet.az xəbər verir ki, bu fikirlər siyasi ekspert Turan Rzayevə məxsusdur.

Siyasi ekspertin sözlərinə görə, Finlandiya faktiki olaraq, Ukrayna nümunəsindən ehtiyat edərək Qərbin şirnikləşdirməsinə aldanaraq Rusiya ilə fəsadları ağır olacaq bir macəraya girmək istəmir: "Prinsip etibarilə, bu gün Rusiyanın sözügedən ölkələrlə hər hansı problemi mövcud deyil. Bunu Rusiya prezidenti Vladimir Putin də vaxtilə həmin ölkələrə xəbərdarlıq edərkən bəyan etmişdi. Görünür, indi Kreml Helsinkini bu və ya başqa yolla inandıra bilib".

Turan Rzayev hesab edir ki, Finlandiyanın indiki məqamda NATO-ya üzvlükdən imtina etməsi real deyil: "Bunun bir neçə səbəbi var. Birincisi, Finlandiyanın NATO-ya üzvlükdən imtina etmək kimi bir düşüncəsi olsaydı, İsveç ilə birlikdə Ankaranı narahat edən bütün məsələləri nəzərə alan memorandum imzalamazdı. Türkiyə də öz növbəsində İsveç və Finlandiyanın NATO-ya daxil olmasına etirazını geri götürüb. Yəni rəsmi Helsinkinin NATO yolundakı ən böyük mane aradan qalxıb. İkincisi, Finlandiyanın xarici işlər naziri Pekka Haavisto hazırda Finlandiyada NATO qüvvələrinin yerləşdirilməsinə ehtiyacın olmadığını bildirib, ancaq ölkəsinin NATO-ya üzv olmayacağına dair nəsə deməyib. Üçüncüsü, Rusiya əslində Finlandiya və İsveçin NATO-ya üzv olmasına qarşı deyil. Rəsmi Kreml NATO qüvvələrinin bu ölkələrə, daha doğrusu Rusiya sərhədinə gətirməsinə qarşıdır. Prinsip etibarilə, Putin NATO hərbi infrastrukturunun İsveç və Finlandiyada yerləşdirilməsi halında buna adekvat cavab verməyə məcbur olacağını deyib. Yəni, həmin ölkələrin NATO-ya üzv olması Kreml üçün elə də əhəmiyyət kəsb etmir. Nəticə etibarilə nə Finlandiya Kremlin qəzəbinə tuş gəlmək istəyir, nə də Kreml Finlandiyada özünə yeni bir cəbhə açıb mövcud vəziyyətini daha da ağırlaşdırmaq istəyir. Kreml üçün NATO qüvvələrinin sərhədlərinə yerləşdirilməməsi hazırda əsas tələbdir".

Vazeh BƏHRAMOĞLU,

Hurriyyet.az

1954-cü ildə istehsal olunan “Qaz 12” SATILIR – ONDAN XRUŞOV DA İSTİFADƏ EDİB / FOTOLAR