Ət qiymətinə alça: Meyvə-tərəvəzə nə vaxta kimi tamarzı qalacağıq?

“Meyvə-tərəvəzin baha satılmasının əsas səbəbi məhsul istehsalında müşahidə olunan azalmadır.

Bu sözləri kənd təsərrüfatı üzrə ekspert Vahid Məhərrəmov Yenisabah.az-a açıqlamasında deyib. 

Qeyd edək ki, bazar və marketlərdə bahalaşma davam edir. Yay aylarına doğru getdikcə insanların meyvə-tərəvəzə olan tələbatı artır. Lakin meyvələrin qiymətində müşahidə olunan artıma görə, insanlar onu almaqda çətinlik çəkirlər. Hazırda bazarda 1 kiloqram alçanın qiyməti təxminən 1 kiloqram ətin qiymətinə bərabərdir.

Ekspertin sözlərinə görə, məhsul istehsalında istifadə olunan istehsal vasitələrinin qiyməti də bahalaşıb:

“Bunun iki səbəbi var. Əgər təklif çox olardısa, qiymətlər bu qədər artmazdı. Ən başlıca səbəb bundan ibarətdir ki, təklif azalıb. Məhsul istehsalında ciddi azalma müşahidə edilir. Bu səbəbdən də qiymətlər yüksəkdir. İkinci səbəb isə məhsul istehsalında istifadə edilən istehsal vasitələrinin qiyməti bahalaşıb”.

V.Məhərrəmov qeyd edib ki, istehlakçılar artan xərci məhsulun qiymətini artırmaqla kompensasiya edirlər:

“Digər tərəfdən, xidmət də bahalaşıb. Ümumilikdə bütün məhsulların qiymətində bahalaşma var. Meyvə-tərəz istehsalçıları yalnız istehsalçı deyillər. Həm də istehlakçıdırlar. Onların istehsal, istehlak, kommunal xərclər artıb. İstehlakçılar artan xərci məhsul qiymətini artırmaqla kompensasiya edirlər”.