Saat:19:24
Haqqımızda

"Ermənistanda Rusiyaya inam azalıb və Paşinyan bu tendensiyanın artmasında maraqlıdır" - ELXAN ŞAHİNOĞLU

2024-03-27 11:35:26

"Moskva Rusiyadakı ermənilərin Ermənistana pul köçürmələrinə qadağa qoysa, qonşu ölkədə iqtisadi vəziyyət ağırlaşacaq"

"Rusiya prezidentinin mətbuat katibi Dmitri Peskov və Rusiya Xarici İşlər Nazirliyinin sözçüsü Mariya Zaxarova son günlər Ermənistan hakimiyyətinə iki mesaj göndərirlər. Birinci mesaj bundan ibarətdir ki, Rusiyada yaşayan ermənilərin sayı Ermənistanda yaşayan ermənilərdən çoxdur. Yəni, demək istəyirlər ki, Rusiyadakı ermənilər Ermənistandakı ermənilər kimi düşünmür və baş nazir Nikol Paşinyanın Qərblə yaxınlaşmaq siyasətindən narazıdırlar. İkincisi, Rusiyada yaşayan ermənilər Ermənistana hər il milyardlarla dollar pul köçürürlər və bu, Ermənistan büdcəsindəki vəsaitdən çoxdur". Hurriyyet.az xəbər verir ki, bunu "Atlas" Araşdırmalar Mərkəzinin rəhbəri, politoloq Elxan Şahinoğlu deyib.

Politoloq qeyd edib ki, bu, Kremlin Ermənistan hökumətinə xəbərdarlığıdır: "Yəni, demək istəyirlər ki, Qərbə yaxınlaşmağa çalışan Ermənistan hökumətinə təzyiq etmək üçün Kremlin əlində güclü maliyyə aləti var. Moskva Rusiyadakı ermənilərin Ermənistana pul köçürmələrinə qadağa qoysa, qonşu ölkədə iqtisadi vəziyyət ağırlaşacaq. Nikol Paşinyan bu ssenarini nəzərə almaya bilməz. Əslində, Moskva bu alətə əl atarsa bu, Nikol Paşinyanın ABŞ və Avropa İttifaqından təhlükəsizlik təminat almaq siyasətində işini asanlaşacaq. Çünki bu halda ABŞ və Avropa İttifaqı Nikol Paşinyan hökumətini Kremlin maliyyə təzyiqindən qurtarmaq üçün Ermənistana maliyyə dəstəyini artıracaq".

Ermənistanda keçirilən rəy sorğularında Rusiyaya inamın azaldığını vurğulayan Elxan Şahinoğlu hesab edir ki, Nikol Paşinyan bu tendensiyanın artmasında maraqlıdır: "Bunu Kreml də anlamamış deyil. Ona görə də Kreml pul köçürmələrinin dayandırılması kimi aləti ən sona saxlayıb".

Vazeh BƏHRAMOĞLU,

Hurriyyet.az

1954-cü ildə istehsal olunan “Qaz 12” SATILIR – ONDAN XRUŞOV DA İSTİFADƏ EDİB / FOTOLAR