Ərdoğan ilə Qaribaşvili Nyu-Yorkda görüşdülər
Gürcüstan-Türkiyə-Azərbaycan üçtərəfli əməkdaşlıq formatına böyük üstünlük verilir
Hurriyyet.az xəbər “Qruziya Onlayn” portalına istinadən verir ki, Nyu-Yorkda Türkiyə Prezidenti Rəcəb Tayyib Ərdoğan ilə Gürcüstanın Baş naziri İrakli Qaribaşvili arasında görüş keçirilib. Tərəflər regiondakı vəziyyəti müzakirə ediblər. Gürcüstan hökumətinin başçısı qeyd edib ki, Gürcüstanın əsas hədəfi Qafqazda sabitliyi dəstəkləməkdir və Tbilisi uzunmüddətli sülhün təmin edilməsində öz sülhməramlı missiyasını yerinə yetirməyə hazırdır.
Danışıqlar zamanı İrakli Qaribaşvilinin vasitəçiliyi və ABŞ-ın iştirakı ilə Ermənistanla Azərbaycan arasında əldə edilmiş razılaşma da müzakirə edilib – həmin razılaşma əsasında separatçı və terrorçu Ermənistan vətəndaşlarının azad edilməsi qarşılığında Azərbaycan minalı ərazilərin xəritəsini almışdı.
Söhbət zamanı Gürcüstanın Baş naziri Tbilisi ilə Ankara arasında strateji tərəfdaşlığın dərinləşməsi istiqamətində Türkiyə liderinin xüsusi fəaliyyətini qeyd edib. İki ölkə arasında siyasi və iqtisadi əlaqələrin, ticarətin genişləndirilməsi prioritert məsələ kimi diqqət mərkəzində olub.
Danışıqların gedişində Gürcüstan-Türkiyə-Azərbaycan üçtərəfli əməkdaşlıq formatına böyük üstünlük verildiyi qeyd edilib.