Əli Kərimlinin köməkçisi sərbəst buraxılıb - "RAMİZ MEHDİYEV İŞİ" / YENİLƏNİB

Xəbər verdiyimiz kimi, noyabrın 29-da AXCP sədri Əli Kərimli və ona yaxın olan bir neçə partiya funksioneri saxlanılıb.

Musavat.com xəbər verir ki, onlar Prezident Administrasiyasının sabiq rəhbəri Ramiz Mehdiyevlə bağlı aparılan cinayət işi çərçivəsində məsuliyyətə cəlb olunublar.

Saxlanılanlardan Əli Kərimlinin köməkçisi, "Matros Faiq" ləqəbi ilə tanınan Faiq Əmirlinin ifadə verdikdən sonra evinə döndüyü məlum olub.

Bu barədə onun həyat yoldaşı Lalə Əmirli sosial şəbəkə hesabında məlumat yayıb.

***

AXCP sədri Əli Kərimlinin köməkçisi kimi tanınan və “Matros Faiq” ləqəbi ilə məşhur olan Faiq Əmirli də “Ramiz Mehdiyev işi” çərçivəsində saxlanılıb.

Musavat.com xəbər verir ki, məlumata görə, ölkədə Mehdiyevin yaratdığı iddia olunan “Dövlət Şurası” şəbəkəsi üzrə aparılan istintaq tədbirləri genişləndirilir və bu proses müxalifət düşərgəsinə də sirayət edir.

Mənbələrin bildirdiyinə görə, artıq Əli Kərimli və AXCP-yə yaxın bir sıra şəxslər, o cümlədən Mehmet İbrahim saxlanılıb və onların evlərində axtarışlar aparılıb. Hazırda davam edən əməliyyatlar çərçivəsində saxlanılanların sayının artacağı ehtimal olunur.

“Ramiz Mehdiyev işi” üzrə aparılan istintaqda Mehdiyevin ölkədə siyasi sistemi dəyişdirməyə, 50 nəfərlik “Dövlət Şurası” formalaşdırmağa cəhd göstərdiyi, bu strukturda həm iqtidar, həm də müxalifət daxilindən bir sıra şəxslərin adı hallandığı bildirilir.