"Dünya çempionatında 11 medal mümkündür" - Rəşad Rəsullu

Azərbaycan Cüdo Federasiyasının baş katibi Rəşad Rəsullu Fanat.Az-a müsahibə verib.

Qurum rəsmisi 6-12 oktyabrda Özbəkistanın paytaxtı Daşkənddə keçiriləcək böyüklər arasında dünya çempionatına hazırlıq və yığmanın mundialda imkanları ilə bağlı suallarımızı cavablandırıb.

- Rəşad bəy, Azərbaycan cüdoçularının mundiala hazırlığı barədə məlumat verərsiniz.

- Kişilərdən ibarət yığma dünya çempionatının hazırlığına iyunun 28-dən etibarən, Polşanın Zakopane şəhərində başladı. Orada üç həftəlik təlim -məşq toplanışının ardınca Göygöldə bir neçə ölkənin iştirakı ilə hazırlıq prosesi baş tutdu. Ardınca cüdoçularımız İtaliyanın Riççone şəhərində sınaq xarakterli yarışda qüvvəsini sınadı və elə həmin şəhərdə bir neçə günlük təlim-məşq toplanışına qatıldı. Son hazırlıqlar isə Bakıda keçirilib.

- Yığmanın heyətində iki cüdoçu - Kəramət Hüseynov və Orxan Səfərov uzun müddət idi ki, zədəliydi. Bu səbəbdən onlar Sofiyadakı Avropa çempionatı da daxil olmaqla, bir neçə turniri buraxmalı oldular. Son vaxtlarda yarış təcrübəsinin azlığı onların dünya çempionatında çıxışına təsirini hansı ölçüdə göstərə bilər?

- Kəramət dörd, Orxan üç ay tam gücü ilə məşq edə bilmədi. Hər ikisi Avropa çempionatına yollansaydı, çox güman ki, bizim oradakı medallarımızın sayı daha çox olardı. Təbii ki, bu məqam onların dünya çempionatına hazırlığına təsirsiz ötüşməyə bilməzdi. Lakin hər iki cüdoçu - xüsusən də Orxan - kifayət qədər təcrübəli idmançılardır. Onların hər ikisini məşqçilər İtaliyadakı turnirdə sınaqdan keçirtdi. Bildiyiniz kimi, Orxan orada gümüş medal qazandı. Kəramət isə öz çəkisində yox, 66 kiloda çıxış elədi. İndiki halda, Kəramət millimizin 60 kiloqram çəki dərəcəsində lideridir. Ümid edirik ki, həm Kəramət, həm Orxan Daşkənddə özünü yaxşı tərəfdən göstərəcəklər.

- Qadınların DÇ-yə cəmi iki nəfərlik heyətlə qatılması nə ilə bağlıdır? 

- Yeni qaydalara əsasən, reytinqin ilk "yüzlüy"ündə yer alanlar dünya çempionatında iştirak edə bilər. Yaxud da gənclərin reytinqində ilk "16-lıq"da olanlara bu hüquq verilir. Yuxarı çəkilərdə bizim hələlik elə idmançılarımız yoxdur. Amma aşağı çəkilərdə Leyla və Gültacdan başqa, sözügedən kriteriyalara uyğun gələnlər var idi. Məşqçilər daha optimal variantı seçiblər. 

- Bu, o deməkdir ki, yığma yenə komanda yarışından kənarda qalacaq. Avropa çempionatından sonra sizdən bu barədə soruşmuşdum, yenə həmin mövzuya qayıdaq: Qadınların yuxarı çəkilərində milliləşdirmə gözlənilirmi? 

- Yuxarı çəkilərdə bir çox ölkələrdən yığmamızda çıxış etməklə bağlı müraciətlər olur. Lakin həmin idmançılar artıq karyeralarının sonunu yaşayanlardır. Doğrudur, hazırda kişilərdən ibarət millinin üzvü olan Səid Mollayi də yaşlı idmançı sayılır. Amma o, son olimpiya finalçısıdır, formadadır. Hələ Paris Olimpiadasınadək yüksək səviyyədə olacağına inanırıq. Həmin qadın idmançılarınsa bu günədək elə yüksək nəticəsi də olmayıb. Nəticəsi olan idmançıları isə müvafiq federasiyalar buraxmaq istəmirlər. Ümumiyyətlə, bizim qadın cüdoçulardan əsas gözləntilərimiz qarşıdakı yox, sonrakı Olimpiada ilə bağlıdır. Yeniyetmələrdə, gənclərdə yetərincə perspektivli idmançılarımız var.

- Kişilərin çalışdırıcısı Riçard Trautmanın təyinatından 7 ay keçir. Odur ki, bu dünya çempionatında artıq baş məşqçi işi özünü göstərməlidir. Ötən müddətdə əsasən hansı çatışmazlıqlar üzərində iş aparılıb?

- Bizdə həmişə kumi kata, yəni tutmalar problemli olub. Xüsusilə bunun üzərində iş aparılır. Trautman ne-vazalara, başqa sözlə, parterə xüsusi diqqət yetirir. Ayrılıqda, performans direktorun rəhbərliyi ilə mütəmadi olaraq analizlər aparılır, görüşlər, buraxılan səhvlər təhlil edilir. Dünya çempionatına hazırlıqda buna böyük diqqət yetirilib. İdmançılarımızın rəqibləri ayrı-ayrılıqda geniş təhlil olunub.

- Neçə medal mümkündür? 

- 11 cüdoçu varsa, 11 də medal mümkündür.

- Əsas medal ümidləriniz kimlərdir?

- Ad çəkmək istəmirəm. Amma bizim kişilərdə əksər çəkilərdəki cüdoçularımız dünya çempionatında bu vaxtadək medal qazanıblar. Digərlərinin isə Avropa çempionatlarında, "Dünya Turu" seriyasında mükafatları var. Odur ki, hər birindən uğurlu çıxış gözləməyə dəyər. Mən hətta qadın cüdoçularımızdan da yaxşı çıxış gözləyirəm.

- Bəli, dünya çempionatlarında yetərincə medallarımız olub. Amma baş mükafat sadəcə bir dəfə qazanılıb və həmin tarixdən də artıq 9 il keçir. Odur ki, bütün cüdosevərləri düşündürən qızıl medaldır. İndiki halda da buna iki daha real namizəd var. 

- Siz yəqin ki, Hidayət Heydərov və Səid Mollayini nəzərdə tutursunuz.

- Bəli.

- Əksəriyyət onlardan qızıl medal gözləyir. Amma məncə, onların da üzərinə ağır məsuliyyət yükləmək düz olmaz. Hər şeyi tatami göstərəcək. Ola bilər ki, onlardan biri yox, başqa cüdoçumuz özünü ən yaxşı tərəfdən göstərsin. Bu, cüdodur. Sürprizlər həmişə mümkündür.

- 73 kiloqram çəki dərəcəsində yaponiyalı ikiqat olimpiya və üçqat dünya çempionu Şohey Ononun bu mundialda olmaması, sizcə, idmançılarımızın şanslarını nə dərəcədə artırır?

- Düşünmürəm ki, Şohey Ononun olmaması şanslara böyük ölçüdə təsir edir. Onun olduğu yarışlarda da bizim idmançılarımız qızıl medala iddialı olublar. Ono yoxdur, gürcü Laşa Şavdatuaşvili, digər yaponiyalı Soiçi Haşimoto, yerli cüdoçu, italiyalı idmançılar və digərləri var. Ümumiyyətlə, 73 kiloqram kifayət qədər rəqabətli çəkidir.

- Aydındır. Amma bu, böyük faktdır ki, adıçəkilən idmançı uzun illərdir fərdi yarışlarda uduzmur. Son 8 ildə yeganə məğlubiyyəti Tokio-2020-nin komanda yarışında almaniyalı İqor Vandtke ilə görüşdə olub. Bizim idmançılarımızdan Rüstəm Orucov zaman-zaman ya birbaşa, ya dolayısı ilə onunla döyüşməyin mümkün olmadığını dilə gətirib. Haşimoto və digərlərinə qarşı isə belə çəkingənlik yoxdur.

- Maraqlıdır ki, Ononun sonuncu məğlubiyyəti elə sonuncu döyüşünə təsadüf edib. Yenə deyirəm, Hidayət və Rüstəm həqiqətən qızıl medalı qazanacaq gücdədirlərsə, Ononun olub-olmaması çox şeyi dəyişmir.

Sahib Əsədbəyli