"Çelsi" Mudrikin "10 nömrə"sini başqa futbolçuya verdi

"Çelsi"də 10 nömrəli formanın yeni sahibi bəlli olub.

İngiltərə millisinin hücumameyilli yarımmüdafiəçisi Koul Palmer həmin nömrə ilə çıxış edəcək.

Bu barədə London klubunun mətbuat xidməti məlumat yayıb.

Palmer 2023-cü ilin sentyabrında 47 milyon avroya "Mançester Siti"dən transfer olunduqdan sonra "Çelsi"də 20 nömrəli formanı geyinir. Bununla belə, ingilis futbolçu yaxında ABŞ-də start götürəcək 2025-ci il klublararası dünya çempionatından başlayaraq 10 nömrəli formanı geyinəcək.

Qeyd edək ki, "Çelsi"nin heyətində 10 nömrəli formanı 2023-cü ilin yayından Mixail Mudrik geyinirdi. Ukraynalı London klubunda ilk 6 ayda "15 nömrə" ilə çıxış edib.

Qeyd edək ki, Mudrik dekabrın ortalarında dopinq testindən keçə bilməyib. "Çelsi"nin cinah oyunçusunun bədənində qadağan olunmuş dərman - meldonium aşkarlanıb. Onu 4 ilə qədər müddətə diskvalifikasiya gözləyir.  Ukraynalı futbolçu sonuncu dəfə "Çelsi"nin iştirak ərizəsinə dekabrın 1-də "Aston Villa" ilə oyunda daxil olub. O, London klubunun heyətində 2024/25 mövsümündə 15 oyuna çıxıb, 3 qol vurub və 5 məhsuldar ötürmə edib. \\Fanat.Az