Bu dəfə doğrudan da çox “başlar" əziləcək - Politoloq Vasif Əfəndiyev

Vəhdət Partiyasının sədr müavini, politoloq Vasif Əfəndiyev

İndi artıq tam aydın görünür ki, nə Prezident, nə də təhlükəsizlik strukturları Ramiz Mehdiyevin uzun illər ərzində formalaşdırdığı və böyük inzibati-maliyyə dayaq nöqtələrinə malik olmuş “daxili hakimiyyət müxalifəti” barədə təsadüfən susmurdular.

Bu proseslərin kökü daha dərindəyirmiş. Mən bununla bağlı hələ Ramiz Mehdiyev siyasi səhnədə olduğu dövrdə dəfələrlə yazmış, ölkədə “klassik müxalifət” anlayışının faktiki mövcud olmadığını vurğulamışdım.

Yəni söhbət qanun çərçivəsində fəaliyyət göstərən müxalifətdən yox, kimlərinsə təyin etdiyi, kuratorların əlaltısı və kölgədən idarə olunan strukturlardan gedir.

Bu gün Əli Kərimlinin saxlanması ilə bərabər səpələnən daşlar artıq yerinə oturmağa başlayır. Uzun müddət saxta müxalifətin və onun ətrafının mənşəyi bilinməyən maliyyə resursları ilə fəaliyyət göstərməsi, eləcə də partiya sıralarında irançı ideoloji xəttə və etnik separatizmə meyl edən qrupların cəmləşməsi uzun müddət diqqətindən yayınırdı, amma bu təhlükə həqiqətən mövcud idi.

Bu barədə mən dəfələrlə yazmış, hətta bəzi partiya üzvləri ilə məlumat xarakterli yazışmalar aparmışdım. Bununla belə, onlara qarşı uzun müddət qəribə bir loyal münasibət göstərildi.

Hətta daha dramatik bir proses də baş verdi. antimilli, radikal iranpərəst ünsür Taleh Bağırzadə və onun silahdaşlarına siyasi çevrələr tərəfindən çətir açıldı, onların müdafiəsi üçün cəhdlər edildi, adları siyasi dustaq siyhaısına salındı.

Halbuki real vəziyyət bu qrupların ölkənin milli təhlükəsizliyinə real təhdid idilər.

Bu gün baş verənlər, o cümlədən Əli Kərimlinin həbsi onu göstərir ki, artıq sistem daxilində uzun illər toxunulmaz görünən dairələrə qarşı proses başlayıb.

Görünür, “daxili müxalifət” adlandırılan, amma faktiki olaraq kölgədən maliyyələşən və milli maraqlara zidd fəaliyyət göstərən strukturların ifşası dönməz mərhələyə qədəm qoyur.

Bu dəfə doğrudan da çox “başlar əziləcək”. Bu siyahıda həm keçmiş, həm indiki yüksək vəzifəlilər, həm köhnə və yeni deputatlar, həm də illərdir “müxalifət” adı altında ölkə içində xaosun instrumentinə çevrilən təyin olunmuş fiqurları görəcəyik.

Buna görə də hamı kimi biz də ölkə rəhbərliyinin xalqa müraciətini gözləyirik. Çünki görünür, Azərbaycan üçün həqiqət anı yaxınlaşır. Bu an baş vermədən ölkənin irəliyə doğru inamla hərəkət etməsi mümkün deyil.

Ölkədə həllini gözləyən bir çox dərdlərimiz var. Nə yazıq ki, antimilli ünsürlər dövlətin ətəyindən asılmış ağır daşlar kimi irəli hərəkətimizi tormozlamağa çalışırlar. \\Milletinsesi.info