"Bankların biznes kreditləşməsinə marağının artırılmasına ehtiyac var" - VÜQAR BAYRAMOV

"İstehlak kreditləşməsinə meyl bank sektorunda yeni çağırışlar yaradır və bu da sektorun dayanıqlığı baxımdan arzuolunan deyil"

"Mərkəzi Bankın məlumatına görə, bu ilin ilk 8 ayında cəmi kredit qoyuluşları 19 milyard 136 milyon manat olub. Vaxti keçmiş kreditlərin həcmi isə 659 milyon manatdır. Kredit portfelinin strukturunda diqqəti çəkən məqamlardan biri hələ də bankların starteji sahələri maliyyələşdirməkdə maraqlı olmamalarıdır. Belə ki, banklar sənaye və istehsal sektoru üzrə 1 milyard 71 milyon manat ayırıblar ki, bu da ümumi kredit portfelinin cəmi 5.6 faizini təşkil edir". Hurriyyet.az xəbər verir ki, bu fikirlər İqtisadi və Sosial İnkişaf Mərkəzinin (CESD) sədri, millət vəkili Vüqar Bayramova məxsusdur.

Millət vəkilinin sözlərinə görə, bu, o deməkdir ki, bankların verdiyi hər 100 manat kreditin hətta 6 manatdan azı sənaye və istehsal sektoruna yönəldilir: "Kənd təsərrüfati sektorunda çalışanların da kredit payı aşağı olaraq qalmaqdadır. Kənd təsərrüfatı, meşə təsərrüfatı və balıqçılıq sektoruna 598 milyon manat kredit yönəldilib ki, bu da ümumi kredit portfelinin cəmi 3.4 faizidir. Nəqliyyat və rabitə, inşaat və tikinti sektorları da ayrı-ayrılıqda ümumi kredit portfelində bir rəqəmli paya malikdirlər".

CESD sədri bildirib ki, kredit portfelindən ən çox faydalanan ev təsərrüfatlarıdır: "10 milyard 328 milyon manat kredit məhz bu istiqamətə ayrılıb. Bu ümumi kredit portfelinin 54 faizini təşkil edir. Qeyd edək ki, bu istiqamətə yönəldilən vəsaitlərin əhəmiyyətli hissəsi istehlak kreditləridir. Bankların istehlak kreditləşməsinə daha çox meyillənməsi həm problemli kreditlərinin həcminin optimallaşmaması, həm də real sektorun maliyyə tələblərinin tam ödənilməməsi baxımdan arzuolunan deyil. Digər tərəfdən, istehlak kreditləşməsinə meyl bank sektorunda yeni çağırışlar yaradır və bu da sektorun dayanıqlığı baxımdan arzuolunan deyil. Mərkəzi Bank tərəfindən biznes kreditləşməsinin təşviq edilməsi və istehlak kreditlərinin həcminin optimallaşdırılması ilə bağlı daha sistemli fəaliyyətlərin həyata keçirilməsinin məqsədəuyğun olardı. Stimullaşdırıcı metodlar ilə bankların biznes kreditləşməsinə marağının daha artırılmasına ehtiyac var".

Vazeh BƏHRAMOĞLU,

Hurriyyet.az