AXCP Əli Kərimlinin saxlanılması ilə bağlı bəyanat yaydı

Azərbaycan Xalq Cəbhəsi Partiyası (AXCP) partiya sədri Əli Kərimlinin saxlanılması ilə bağlı bəyanat yayıb. 

Hurriyyet.az AXCP Mətbuat Xidmətinin yaydığı bəyanatı təqdim edir:

"Bu gün AXCP sədri Əli Kərimli Dövlət Təhlükəsizliyi Xidmətinin (DTX) əməkdaşları tərəfindən saxlanılıb. Onun saxlanılması üçün heç bir rəsmi əsas açıqlanmayıb. Həmçinin, onun evində axtarış aparılıb.

Eyni zamanda, AXCP Rəyasət Heyətinin üzvü Məmməd İbrahimin evində axtarış aparılıb, özü isə saxlanılıb. 

Partiyanın başqa bir neçə nəfər fəalının da saxlanıldığı haqda məlumatlar var.

Bəyan edirik ki, Əli Kərimlinin saxlanılması sırf siyasi motivlidir. Son illərdə hakimiyyət ona faktiki blokada tətbiq edib. Buna baxmayaraq, Əli Kərimli Azərbaycanda əsas demokratik fiqurlardan biri olaraq qalır: onun aparıcı beynəlxalq mediaya verdiyi müsahibələr və qlobal siyasi forumlara dəvət alması İlham Əliyev rejimini narahat edib.

Siyasi fəaliyyətin ölkədə demək olar ki, tamamilə qadağan olunduğu, vətəndaş azadlıqlarının ciddi şəkildə məhdudlaşdırıldığı bir şəraitdə bu əməliyyat siyasi repressiyaların daha da gücləndirilməsi istiqamətində növbəti addımdır. 

Bugünkü saxlanılma hakimiyyətin Azərbaycanda son müstəqil siyasi qüvvəni aradan qaldırmaq və xalqın demokratiya və azadlıq uğrunda mübarizəsini tamamilə boğmaq cəhdi olaraq qiymətləndirilməlidir.

AXCP Əli Kərimlinin, Məmməd İbrahimin və  partiyanın başa saxlanılan üzvlərinin dərhal azad olunmasını, müxalifət üzvlərinə və tərəfdarlarına qarşı təqiblərə son qoyulmasını, saxlanılanlara hüquqi müdafiəyə çıxışın təmin edilməsini və onların təhlükəsizliyinə zəmanət verilməsini tələb edir.

Beynəlxalq ictimaiyyəti, insan haqları təşkilatlarını və Avropada və dünyada demokratik hökumətləri bu hadisələrə təcili reaksiya verməyə və Azərbaycan hakimiyyətindən beynəlxalq insan hüquqları öhdəliklərinə əməl etməyi tələb etməyə çağırırıq".

Hurriyyet.az