Avropa rəsmisi: Gürcüstan hakimiyyəti olmasa da, gürcü xalqı Aİ-də olmağa layiqdir

Avropa Parlamentində Gürcüstanın hazırkı vəziyyəti ilə bağlı müzakirələr zamanı Avropa Parlamentinin deputatı Viola fon Kramon deyib: “Gürcüstan xalqı, hətta hazırkı hökuməti layiq olmasa belə, Avropa İttifaqında olmağa layiqdir”.
Avropa Parlamentinin deputatının fikrincə, Gürcüstan hökuməti ölkənin Avropa yolunu sabotaj etmək istəyir, onun sözlərinə görə, gürcü xalqı bununla razı deyil.
Viola fon Kramonun qeyd etdiyi kimi, qarşıda Gürcüstanın Avropa gələcəyinə aparan yalnız bir yol var.
“Maskalar nəhayət cırıldı. Gürcüstan hökuməti ölkənin Avropa yolunu sabotaj etmək istəyir. Xoşbəxtlikdən gürcü xalqı bununla razılaşmır. Rus bataqlığına geri yol yoxdur. Məhdud azadlıqlar və avtokratiyaya qayıdış yolu kəsilib. Qarşıda Gürcüstanın Avropa gələcəyinə aparan yalnız bir yol var. Gürcü xalqı öz hökumətindən köklü şəkildə fərqlənir, hər kəs səsini Tbilisidə, Brüsseldə və xüsusən də Moskvada eşitdirmək üçün küçələrə çıxdı. Tbilisi, Batumi və ya Kutaisi küçələrində dayananlar gürcülərin 80%-dən çoxunun adından danışırdılar. Avropa kimliyini su şırnaqları ilə yumaq olmaz. Avropa İttifaqının bayrağını yandırmaqla gürcülərin ürəyindəki Avropanı yandırmaq olmaz. Azadlıq uğrunda mübarizə aparanlara qarşı zorakılıq faydasızdır. Gürcüstan konstitusiyası toxunulmazdır və onun 71-ci maddəsi hökumətdən Gürcüstanın Avropa İttifaqı və NATO-ya tam inteqrasiyasını təmin etməyi tələb edir. Buna baxmayaraq, hakimiyyət bir oliqarxın və Kremlin maraqlarını Gürcüstan Konstitusiyasından üstün tutub. Hakimiyyətdə olanlar xalqına xəyanət edəndə o insanlar güc nümayiş etdirirlər. Gürcülərdən nümunə götürmək və Avropanın gələcəyi üçün mübarizə aparmaq vaxtıdır. Gürcü xalqı, hətta hazırkı hökuməti layiqli olmasa belə, Avropa İttifaqında olmağa layiqdir”, deyə Viola fon Kramon bildirib.
Ülviyyə, Hurriyyet.az