Saat:03:46
Haqqımızda

Abşeron-Xızı Regional Təhsil İdarəsində BÖYÜK YEYİNTİ - İTTİHAM VAR!

2023-05-30 12:20:00

Abşeron-Xızı Regional Təhsil İdarəsində BÖYÜK YEYİNTİ - İTTİHAM VAR!

Redaksiyamıza Sumqayıt şəhər sakini, Silahlı Qüvvələrin istefada olan zabiti, tərcüməçi-publisist Rzayev Vidadi Əsədulla oğlunun Abşeron-Xızı Regional Təhsil İdarəsində baş verən cox(!) ciddi qanun pozuntuları və özbaşınalıqlardan bəhs olununan yazı daxil olub.

“MİLLİ TƏHSİL SİSTEMİMİZ NECƏ SÜQUTA UĞRADILIR
və ya Abşeron-Xızı Regional Təhsil İdarəsinin müdiri İlhamə Abdullayevanin Kvintessensiyalar sərrafı ustad sənətkar Alkofribas Nazyenin yazdıqlarından daha “dəhşətli” və “cəsarətli” QOÇAQLIQLARI, ağlasığmaz fantastika dolu bir hekayət

SÖZÖNÜ:

Lütfən, kimsə qalxıb mənə İdarə müdirinin xanım olmasından və ona bu yanaşmanın bir bəyə yaraşmamasından dəm vurmasın. Zira bu xanımın əməllərindən zərər görən, hətta ağır sinir krizi keçirən müəllimə xanım, valideyni ilə prinsip apardığına görə ağır psixoloji travmaya uğradılan məktəbli uşaq, neçə illər işləyib, can qoyduğu vəzifəsini, bununla birlikdə isə özünün və ailəsinin rifahını və gələcəyə xoş ümidlərini, bir nəfərin hikkəsi və cılız maraqları üzündən bir anda itirən, bədbinləşən, depressiyaya düşən insanlar tanıyıram. Nəzərə alın ki, bu material Vətənin ağır günlərində sinəsini düşmən önündə sipər etmiş, millətinin gələcəyi üçün daim narahat olan, bu gələcəyə qarşı ağır cinayətlər törədənlərin əməllərinin cəzasız qalmasından dərin sarsıntı keçirən, Qırmızı Cizgisi – Vətəni, Dövləti və Bayrağı olan bir Vətənpərvər Ziyalı, bir Qazi Zabit tərəfindən yazılmışdir. Odur ki, kim olmağınızdan, hətta kiməsə trolluq etməyinizdən (əksəriyyətə aid deyil, sözü yiyəsi özünə götürəcək) asılı olmayaraq, Ruhunuzda ləyaqətin son işartılarının sönməsinə imkan verməyin. Unutmayın: TƏHSİL MİLLƏTİN (SƏNİN, MƏNİM, HAMIMIZIN) GƏLƏCƏYİDİR!
_____________________________________________________________
Bildiyiniz kimi, Milli Təhsil sistemində əsaslı keyfiyyət dəyişikliklərinə hesablanmış köklü islahatlar nəticəsində, idarəetmənin daha da effektivləşdirilməsi məqsədilə Azərbaycanın şəhər və rayon təhsil şöbələrinin əsasında Regional Təhsil İdarələri yaradıldı. Amma…

Amma Abşeron-Xızı Regional Təhsil İdarəsinin xanım müdiri İlhamə Abdullayeva vəzifəyə necə təyin olunmuşdusa, idarəyə rəhbərlik etməyə başladığı gündən etibarən, elə o qaydada da kadr islahatları aparmağa başladı.

Belə ki, İ.Abdullayeva layiq olmadığı halda böyük bir Təhsil İdarəsinə rəhbər təyin olunmasından necə ilhamlandısa, təhsil idarəsindəki kadrlara da öz “prinsip və baxışları” çərçivəsində eləcə “əl gəzdirməyə” başladı. Bu minvalla Dövlət Qurumunu, feodal qayda-qanunlarına tabe olan bir Ortaçağ Doğusu GİLDİYAsına çevirərək, İdarədə savadlı, işini bilən, açıqsözlü, dürüst, yaltaqlıqla işi olmayan kadrları “təmizləyərək”, yerinə əqidəcə özünə yaxın şəxsləri təyin etdi. Azmış kimi, guya öz xahişi ilə işdən çıxmış, əslində isə yorulmadan, usanmadan hər fürsətdə hikkə ilə – “Mən səninlə işləmək istəmirəm, ərizəni yaz, işdən çıx!” – deyə-deyə, “öz xahişi ilə” işindən qoparıb, həyatını qaraltdığı əməkdaşların, şəffaflığı təmin etmək məqsədi ilə uzaqlaşdırması haqda həqiqətə zərrəcə uyğun olmayan şaiyələr yaymağa başladı. Neçə illər təhsil təcrübəsi olan, dövlət qulluqçusu statusunu müvafiq imtahandan keçərək öz biliyi və bacarığı ilə qazanan və illər boyu ləyaqətlə daşıyan, işinin öhdəsindən layiqincə gəlmək üçün həqiqətən can qoyan işçiləri işdən çıxararaq, onların yerinə müqavilə ilə, təhsildə heç bir təcrübəyə, xüsusi savada malik olmayan, ən yüksək məziyyəti müdirinin hər sözünə (doğru və ya yalan, fərq etmir) “bəli-bəli” demək olan işçilər təyin olunmuşdur. Məhz bu səbəbdəndir ki, hal hazırda idarənin bütün sektorlarında xaos hökm sürdüyü haqqında zaman-zaman “içəridən” məlumat sızıntısı baş verir. Şikayəti olan vətəndaş süründürməçiliklərə məruz qalır. İlhamə xanım isə sözün həqiqi mənasında Sumqayıtda özünə XANlıq qurmuşdur. Sadəcə onun işə təntənəli gəliş və gedişini kənardan seyr etmək, dəbdəbəli kabinet üçün dövlət büdcəsini israf etməsini, vətəndaşları qəbul etməməsini analiz etmək bu qənaətə gəlmək üçün əsas verir.

Qayıdaq İlhamə XANımın kadr siyasətinə. Düşündürücü sual budur ki, İlhamə XANımın yeni işə götürdüyü şəxslərin 400-500 manat məvacib üçün Bakı şəhərindən Sumqayıt şəhərinə gəlməkdə maraqları nədir? Əcəba bunlar əvəzolunmaz kadrlardır və Sumqayıt şəhərində bu vəzifələrə yerli mütəxəssislər tapılmır?! Cavab isə tam başqadır – deyilənlərə görə, İlhamə xanım bu kadrlara, yəni öz adamlarına, maaşdan əlavə “paket”də verir. Bu paketlərin maliyyəsi haradan qaynaqlanır çox maraqlıdır, amma dövlət büdcəsindən olmadığı şübhəsizdir.
Sızan məlumatlara görə, Təhsil idarəsinin sütununu təşkil edən maliyyə-təsərrüfat sektoru daha acınacaqlı durumdadır. İllik büdcəsi 160 milyon manat civarında olan idarənin maliyyə sektoruna əvvəllər Azərpoçtda işləyən, 5-cə aylıq mühasib stajı olan birini – Orxan Şirəliyevi rəhbər təyin etdilər (Orxan Şirəliyevin, Təhsil Nazirliyinin Maliyyə şöbəsinin rəisi Rauf Orucovun oğlunun yaxın dostu olması da sızan məlumatlar qəbilindəndir).

Orxan Şirəliyevin maraqlı məharətlərindən biri də Təmizlik departamenti ilə bağlanmış müqavilədir: bu müqavilənin maliyyə dəyərini şəhərin təhsil müəsisələri arasında ( məktəblərin böyük, kiçikliyindən asılı olmayaraq ) ata malı kimi 69,89 manat olmaqla, bərabər bölüb. Bu cənab özü mənimsədiyi pulları direktorların üzərinə qoyaraq hər ay akt yazdırır. Əslində isə məktəblərdə məişət tullantıları üçün zibil qabları belə yoxdur. Maraqlıdır, bu məbləğ necə müəyyənləşdirilib, əcəba zibilləri tərəzidəmi çəkiblər?!
Orxan BƏYin və İlhamə XANımın sağ əli olduğu deyilən, maliyyə məsələləri üzrə məsləhətçi, indiyə qədər mühasib vəzifəsində çalışan Vüsal Bayramov isə Maliyyə sektoruna baş məsləhətçi vəzifəsinə təyin olundu. Bu, o Vüsaldır ki, vaxtilə Şəmkir şəhər təhsil şöbəsinin baş mühasibi vəzifəsində işlədiyi dövrdə, müəllimlərin məvacibləri ödənilərkən, əmək haqqı məbləğlərindən qəpikləri kəsərək öz kartına köçürdüyü üçün işdən qovulmuşdu.

Yəqin ki, “xüsusi məharətləri” ilə Orxan BƏYə və İlhamə XANıma dəstək olduğu üçün hazırda Abşeron mühasibatlığına rəhbərlik bu adama həvalə olunmuşdur. Sözügedən adamların bəzi fəaliyyətləri haqqında elə şeylər eşidirsən ki, buranın Təhsil İdarəsi, yoxsa “Xor dərnəyi” olması haqqında gülünc fikirlər gəlir ağlına. Məsələn, “aşıq” ləqəbli, saz sənətçisi Vüsal Bayramovun, adı işdə gedə-gedə Moskvaya qədər gedib, toylarda sazəndəlik edib qayıtdığı söylənir. Qədim və gözəl adət-ənənələrimizə bütün varlığı, canı-qanı ilə bağlı, Milli Ruhlu bir Ziyalı və Zabit olaraq, Dədə Qorqudun müdriklik, Koroğlunun qəhrəmanlıq Ruhunu özündə daşıyan aşıq-saz sənətinə böyük saygımız vardır, Vüsal bəyin də bu böyük sənətin istedadlı bir sənətçisi olmasi sadəcə alqışlanası haldır, amma… dövlət qulluğu ilə sənətçilik bir araya sığmırsa, onda ya Vüsal bəyin özü bu ikisi arasında seçim etməli, ya da idarənin müdiri buna bir əncam çəkməli idi, həm də çoxdan.
Deyilənlərə görə, Vüsal BƏYin heç olmasa sənətçiliyi varsa da, cənab Orxan Şirəliyevin bütün fəaliyyəti sadəcə olaraq xidməti vəzifələrinin icrasının imitasiyasından ibarətdir.
Bir də onu qeyd etmək yerinə düşər ki, İdarədə dövlət qulluqçusu vəzifəsi tutanların heç biri – nə Vüsal Bayramov, nə Orxan Şirəliyev, nə Məmməd Bayramov nə də başqaları – dövlət qulluğu imtahanından keçməyiblər və dövlət qulluğunda bircə gün belə stajları olmayıb.
Nə İlhamə xanımın, nə müavinlərinin iqtisadi biliyinin olmaması, ümumiyyətlə idarədə maliyyə sayəsində ixtisaslı və təcrübəli bircə nəfər də kadr olmaması, bu səbəbdən işlərin kortəbii surətdə aparılması, “cidanı çuvalda gizlətmək məsələsi” qədər, hər kəsə “gizlindir”. Deyilənlərə görə İlhamə XANım maliyyə sənədlərinə gözüyumulu imza atır, çox vaxt da imzasının möhür variantı ilə katibəsi imzalayır. Hesablamalar səhvdir, ya düzdür – heç kimin vecinə deyil. Nəticədə olan dövlət büdcəsinə olur.
Sadəcə bir faktı deyim, nəticə çıxarın: Belə ki, Abşeron üzrə müəllimlərə yoxlama yazı pulları sentyabr ayından ödənilib, halbuki artıq neçə illərdir yazı pullarının ləğv olunduğunu məktəblərdə hər kəs bilir və İlhamə XANım indi ayılaraq, nə qədər artıq pul ödənildiyəndən xəbər tutub. İndi isə o pulların geri tutulmasına qərar verən müdir XANım Azərbaycan Respublikasının Əmək Məcələsindən tam xəbərsiz olduğunu da hər kəsə sübut etmiş oldu. Lütfən, biriniz ona deyin, əziyyət deyilsə, Əmək Məcələsinin 175-ci maddəsini (Əməkhaqqından tutulmalara yol verən hallar və bunun icrası qaydası, bənd 3 və 5) açıb oxusun.
Təhsil İdarəsinin Təsərrüfat sektorunun isə daha bərbad vəziyyətdə olduğu söylənir: belə ki, bu sektorda da digər sektorlar kimi 1-2 nəfər işləyir, qalanları isə yüksək miqdarda qonorarlarını xərcləməklə məşğuldur; İlhamə XANıma yaxınlığı ilə seçilən və Əliyev Rövşən, Bayramov Məmməd adlı işçiləri işdə görmək mümkün deyil; İlhamə XANımın doğma bacısının həyat yoldaşı (əvvəl surucusu olan, İlhamə XANım vəzifəyə gələn kimi, “sehirli çubugun” hökmü ilə bir anda mühəndisə çevrilən) Səbuhi bəyin adı təsərrüfat sektorunda mühəndis kimi sənədləşsə də, ümumiyyətlə işə gəlmir;

lhamə XANım özünün digər qohumu Raufu da guya həmin sektora mühəndis təyin etmişdir, amma Raufun nə iş gördüyünü bir Allah bilir, bir də özü. Hərdən adamı fikir götürür ki, görəsən İlhamə XANım müdir təyin olunmasaydı, bu qədər qohum-əqraba necə iş tapacaqdı?! Məsələn, İlhamə XANımın təsərrüfat sektorundakı digər yaxın qohumu (xalası qızının oğlu olduğu deyilən) Nicat bəy isə əməlli-başlı səlahiyyət yiyəsidir. Bu adamın Xırdalan şəhər 2 nömrəli məktəbə fəhlə kimi sənədləşdirərək, özünə sürücü belə götürdüyünü çoxları deyir. 350-400 manat civarında maaş alan adam özünə sürücü götürür və “şəffaf” işləyir!!!

Abşeron rayonu üzrə işə qəbul məsələlərinin Nicata “tapşırıldığı” deyilir. Təsərrüfat sektorunun vəzifə funksiyası ”Məktəblərin tələbatının müəyyənləşdirilməsi və lazım olan mal-materialla vaxtında təmin olunması” olsa da, bu iş təsərrüfat işçiləri üçün hazırda ikinci dərəcəlidir. Adamlar ancaq hansısa bəhanə ilə işdən çıxarmağa adam axtarırlar ki, yerinə nəyinsə müqabilində öz adamlarını təyin etdirsinlər.
İlhamə xanım tərəfindən dövlət qulluğu vəzifəsinə təyin edilən işçilərdən birinin – konkret olaraq Məmmədov Bayramın törətdiyi bir avtomobil qəzasında, velosipedçini vurub qaçdıqdan sonra, polisə müqavimət göstərdiyi üçün, saxlanılıb, şöbəyə gətirilərkən, baxış zamanı, onun üzərindən nələr(!) çıxdığını yazsaq, İlhamə xanımın kimlərlə işlədiyini təsəvvür edib, dəhşətə gələrsiniz. Zamanında bu hadisənin bəzi dairələrdə bomba partlayışı effekti doğurmasına və İlhamə xanımın özünəməxsus məmur “istedadları” ilə onu “ötüşdürməsinə” baxmayaraq… kimsənin şəxsi işinə qarışmaq kimi bir haqqı özümüzə tanımadığımız üçün, təfərrüatların üzərindən sükutla keçməyə məcburuq.
Önəmli qeyd: materialda sözügedən dövlət qulluğu vəzifələrini tutan şəxslərin heç biri dövlət qulluqçusu statusuna malik deyil, çünki bu vəzifələri qanuni əsaslarla tutmayıblar.

P. S. Opponentlərim məni sifarişli yazılar yazmaqda suçlayırlar və etiraf edim ki, onlar tamamilə haqlıdırlar. Bəli, var elə bir sifarişçi. O, AXRTİ-də törədilən müdhiş qanunsuzluqlara susa bilməyən Vicdanım və Fədaisi olaraq, uğrunda hər an ölməyə hazır olduğum, sağlamlığımi itirib xəstə düşdüyüm Vətənimi, Sumqayıtda özünə “Xanlıq” qurmuş feodal təfəkkürlü adamların istismarindan azad etmək Əzmimdir!

SON SÖZ
Sonda məlumat üçün deyim ki, bu gün Abşeron-Xızı​ Regional Təhsil İdarəsininin tabeliyində olan bağçaların, ümumtəhsil məktəblərin və məktəbdənkənar təhsil müəssisələrin sayı 206 ədəddir. Bu təhsil müəssisələrində Vətənimizin işıqlı gələcəyi üçün çalışacaq ləyaqətli şəxsiyyətlər kimi yetişməli olan on minlərlə şagird təhsil alır, onların təlim-tərbiyəsi ilə də coxminlik müəllim heyəti məşğul olur. Və belə nəhəng bir Ordu, məqsədi, məramı, amalı, idealı bəlli olmayan, iradəsini hikkəsinə kölə etmiş, Dövlətimizin dünya düzənində yerini möhkəmlətmək yönlü, Təhsil Sisteminin effektivləşdirilməsini də özündə ehtiva edən qlobal maraqlarını, özünün bəsit şəxsi mənfəətinə qurban verən belə bir XANım tərəfindən idarə olunur. Düşündürücüdür, deyilmi?!… Ardı var…

Redaksiya olaraq qarşı tərəfin də mövqeyini dərc etməyə hazırıq.

Turantv.az

1954-cü ildə istehsal olunan “Qaz 12” SATILIR – ONDAN XRUŞOV DA İSTİFADƏ EDİB / FOTOLAR