Sanksiyalar Azərbaycandakı “Lukoil”-i də vurdu - “Lukoil” məntəqələrində kartla ödəniş dayandırılıb

Dünəndən bəri Azərbaycandakı sürücülər "Lukoil" neft şirkətinə aid olan yanacaq doldurma məntəqələrində kartla ödəniş edə bilmədiklərindən şikayətlənirlər. Sürücülərin sözlərinə görə, "Lukoil" məntəqələri yalnız nağd pul qəbul edir.

Hurriyyet.az xəbər verir ki, “haqqin.az”-ın sorğusuna cavab olaraq, şirkətin Azərbaycan ofisinin əməkdaşı ödəniş terminallarının şirkət sanksiyalar altında olduğu üçün işləmədiyini bildirib.

ABŞ Maliyyə Nazirliyi 24 oktyabr 2025-ci ildə “Lukoil” və onun 34 törəmə şirkətini sanksiya siyahısına əlavə etdikdən sonra şirkət dollar əməliyyatlarına məhdudiyyətlər, ABŞ-dəki aktivlərin dondurulması və Amerika qurumları ilə işgüzar əlaqələrin qadağan edilməsi ilə üzləşdi. Bu, dərhal şirkətin xarici əməliyyatları üçün çətinliklər yaratdı, çünki banklar ödənişləri emal etməkdən imtina etməyə başladılar və bu da onun beynəlxalq əməliyyatlarına birbaşa təsir etdi.

5 noyabr 2025-ci ildə şirkət İsveçrə treyderi “Gunvor”-un Lukoil International GmbH səhmlərinin 100%-ni almaq təklifini qəbul etdi. Lakin ABŞ administrasiyası buna imkan vermədi.

Sanksiya təzyiqi şirkətin Azərbaycandakı nümayəndəliyinə də təsir göstərir. "Lukoil Azərbaycan" sanksiya siyahısına daxil edilməsə də, ABŞ-nin məhdudiyyətləri maliyyə əməliyyatları üçün risk yaradır, çünki dollarla hesablaşmalar və beynəlxalq banklarla qarşılıqlı əlaqələr problemli hala gəlir.

"Lukoil"-ın Azərbaycandakı bəzi layihələrinə sanksiyalar rejimindən istisnalar tətbiq edilib: 14 oktyabr 2027-ci ilə qədər məhdudiyyətlər şirkətin Azəri-Çıraq-Günəşli, Şahdəniz və Xəzər qaz kəmərləri kimi böyük enerji layihələrindəki fəaliyyətinə şamil edilmir. Lakin bu istisnalar yalnız Böyük Britaniya sanksiyalarına aiddir; ABŞ sanksiya paketi oxşar yumşalmanı əhatə etmir.

ABŞ sanksiyalarının güclənməsi səbəbindən Azərbaycan faktiki olaraq "Lukoil"-dən neft alışını dayandırıb.